Blikar mættu ákveðnari inn í leikinn og komu Þrótturum að óvörum með tveimur mörkum strax í upphafi. Þróttarar gerðu vel á eftir því en þegar að þriðja markið kom þá datt botninn úr leiknum og Blikar sigldu þessum sigri auðveldlega í höfn.

Í stöðunni 2-0 fannst manni líklegt að Þróttur myndi skora og minnka muninn og voru að ógna mjög mikið. Agla María skoraði hinsvegar og fullkomnaði þrennuna og drap leikinn algjörlega.

Blikar slá Þróttara út úr bikarnum í þriðja sinn og verða í hattinum góða þegar dregið verður í undanúrslitin.

Þróttarar hefðu átt að skora mörk í dag. Freyja Þorvarðardóttir fer líklega svekkt út í sjálfa sig á koddann í kvöld en ef heppnin hefði verið með henni í liði í dag hefði hún skorað mark eða tvö.

Ívar dæmdi þennan leik óaðfinnanlega í dag. Var ekkert að stoppa leikinn að óþörfu og hélt flæðinu vel uppi. Nik Chamberlain þjálfari Þróttar var ekki sáttur með hann og vildi fá vítaspyrnu en mér fannst sú ákvörðun hjá Ívari vera frábær.