Hreinlega bara gæði Skagamanna fram á við. Grótta var örugglega 80% með boltann en gerðu lítið sem ekker með hann. ÍA gerði vel í að loka svæðinu milli miðju og varnar og þegar þeir unnu boltann var brunað í skyndisóknir sem virkuðu vel í dag. Jón Þór skólaði Chris Brazell.

Það er seinna mark ÍA sem Johannes Vall skoraði. Það kom á besta tíma, rétt fyrir hálfleik, og gerði það að verkum að ÍA gat tekið menn útaf snemma í seinni hálfleik og byrjað að hvíla fyrir leikinn gegn Fjölni á föstudaginn. Síðan má líka nefna atvikið þegar Chris fær gult spjald. Hann biður síðan dómarann um að spjalda Jón Þór skömmu síðar eftir að Jón Þór tryllist. Það var algjör veisla að vera á milli bekkjanna í þessu atviki og heyra öll orðaskiptin.

Skagamenn fara upp í annað sætið og eiga Fjölni í næsta leik sem eru í þriðja sætinu. Það er stórleikur! Grótta hinsvegar fara niður í 6. sætið þar sem Vestri vann í kvöld á móti Selfossi.

Chris Brazell kallinn. Fannst leikplan Gróttu ganga ekki neitt upp í dag og ég er eins ósammála Chris í viðtalinu eftir leik að það hálfa væri nóg. Hann talar um að þetta væri frábær leikur hjá Gróttu og að þetta væri þeirra besti leikur í sumar sem mér finnst algerlega galið. Man ekki eftir neinu færi hjá Gróttu fyrr en alveg í lokin eftir að þeir minnka munin úr vítaspyrnu. 4 leikir án sigurs og það er eins og meiðsli Péturs muni hafa gífurleg áhrif á Gróttu.

Teymið gerði mjög vel í dag fannst mér. Háréttar ákvarðanir trekk í trekk og þeir voru með mjög góð tök á leiknum. Fann til með Bryngeiri að vera með Chris fyrir aftan sig sem lét hann oft heyra það og fékk réttilega gult spjald. Flottur leikur hjá tríóinu.