Sæbjörn Þór Þórbergsson Steinke @saebjornth

Textalýsing Skýrslan Viðtöl

Hvað réði úrslitum? Það er mjög erfitt að skapa fæti á móti liðinu hans Rúnars Kristinssonar og KR skapaði ekkert dauðafæri í dag. Fram fékk fleiri hættuleg færi og úr besta færinu skoraði Freyr eina markið. KR-ingum gekk mjög illa að skapa sér álitlegar stöður og vinnslan í liði Fram til algjörar fyrirmyndar. Bestu leikmenn 1. Kyle McLagan Gjörsamlega geggjaður í hjarta varnarinnar hjá Fram, miðju-miðvörðurinn í þriggja manna línu. Át allt í loftinu og var öryggið uppmálað. Hann er kannski ekki sá besti í löppunum með boltann en hann þarf ekkert að vera mikið með boltann í uppspilinu og er mjög góður í hinum þáttum leiksins. 2. Freyr Sigurðsson Stúkan á AVIS-vellinum hristist aðeins þegar Freyr skoraði. Þessi átján ára Hornfirðingur var að byrja sinn fyrsta leik í efstu deild og sýndi að hann á alveg heima á þessu sviði. Magnús Ingi Þórðarson og Kennie Chopart fá líka að vera nefndir í þessu boxi. Atvikið Sigurmarkið. Það var eins og ákveðið rothögg á KR-inga sem höfðu byrjað leikinn ágætlega. Freyr setti boltann í netið eftir mjög góða sókn Fram í bland við slakan varnarleik KR. KR þurfti að taka leikhlé um stundarfjórðungi síðar því ekkert var að ganga.

Hvað þýða úrslitin? Fyrsti útisigur Fram í Bestu deildinni síðan tímabilið 2022 kom í fyrsta leik Rúnars Kristinssonar sem þjálfari liðsins - og það á ,,heimavelli" KR. Bæði lið eru nú með sex stig í mótinu. Framarar líklega sáttari með þann stigafjölda heldur en KR. Næstu leikir liðanna eru í miðri viku í 32-liða úrslitum Mjólkurbikarsins. Vondur dagur Guy Smit var í alls konar brasi með boltann í dag og hreinlega stálheppinn að hafa ekki kostað mark með sínum tilburðum. Jóhannes Kristinn var ekki frábær þær mínútur sem hann var inn á, þurfti að fara af velli vegna meiðsla í seinni hálfleik og vonandi er hann ekki alvarlega meiddur. Guðmundur Magnússon getur sýnt meira en hann gerði í dag og Atli Sigurjónsson var mjög ólíkur sjálfum sér, gerði lítið. Veðrið fær líka að vera með í þessu boxi. Völlurinn leit mjög vel út (glænýtt gervigras) og umgjörðin mjög flott hjá Þrótti og KR, en veðrið var hörmulegt, megi verða sem sjaldnast rok og rigning þegar blessaða sumarið mætir til leiks. Dómarinn - 9 Mjög vel dæmdur leikur hjá Helga fannst mér, mjög góð stjórn á leiknum.