Hafliði Breiðfjörð @haflidib

Textalýsing Skýrslan

Hvað réði úrslitum? Leikurinn byrjaði ofboðslega rólega í dag og lítið að gerast en það færðist þó fjör í leikinn eftir stundarfjórðung og bæði lið fengu urmul færa til að skora mörk. Markið sem réði úrlitum skoraði FH eftir klafs í teignum en það er þó alveg ljóst miðað við hvernig leikurinn var að hann hefði getað dottið hvorum megin sem var. Markmenn beggja liða voru frábærar í dag og komu í veg fyrir að mörkin yrðu ekki fleiri. Varsla Veru Varis frá Elísu Lönu seint í leiknum var þannig algjört gull. Bestu leikmenn 1. Ída Marín Hermannsdóttir (FH) Mér fannst Ída Marín besti leikmaður FH liðsins í dag, mikið í boltanum og frábærar sendingar en hefði vissulega mátt setja aðeins meiri kraft í skotin sín á stundum. 2. Melanie Claire Rendeiro (Keflavík) Það var mjög gaman að fylgjast með samvinnu Melanie Rendeiro og Saorla Lorraine í Keflavíkurliðinu í dag. Saman sköpuðu þær mikinn usla hjá varnarmönnum FH með frábæru spili. Oft færi sem Melanie bjó til og Saorla gerði vel úr en þó ekki nægilega vel til að skora. Atvikið Mig langar að koma með smá aðra hlið á fótboltanum í þessum lið í dag. Staðan er sú að þó svo að veðmál og auglýsingar veðmála séu ólögleg á Íslandi er ljóst að fótboltafélög hafa verulegar tekjur af veðmálatengdu atriði. ÍTF samdi við Genius Sport um einkarétt til að taka lifandi tölfræði á meðan leikjum stendur, nokkuð sem nýtt er til að þeir sem veðja á leiki sjái nákvæmlega hvað gengur á í leiknum í rauntíma. Til þess mætir maður á hvern leik frá þeim og stimplar stöðugt inn í símann sin á meðan leik stendur. Í dag mætti aukamaður frá fyrirtækinu til að hafa eftirlit með því að enginn væri að brjóta á einkarétt þeirra. Hann sá fljótt fulltrúa frá öðru fyrirtæki, Running ball sem sat í stúkunni í sömu erindagjörðum. Eftir smá bið var Davíð Þór Viðarsson yfirmaður knattspyrnumála hjá FH kallaður til og hann vísaði þeim síðari út af leikvangnum eftir um hálftíma leik. Þarna er hlið á fótboltanum sem fáir þekkja og tilvalið að kynna ykkur hana í þessari skýrslu.

Hvað þýða úrslitin? Þessi þrjú stig skiptu bæði lið svo miklu máli og ljóst að fyrir FH eru þær að koma með yfirlýsingu um að þær ætli að vera þarna í efri hlutanum það sem eftir lifir sumars. Þær eru þó enn þónokkuð frá því að eiga kost á að komast í pakkann með þremur efstu, Þór/KA og Valur eru fimm stigum fyrir ofan þær. Gestirnir í Keflavík verða að bíta í það súra að þeim bíður bara fallbarátta en framundan er vissulega gríðarlega mikilvægur leikur við Tindastól sem eru jafnar þeim að stigum, með 6 stig til þessa. Vondur dagur Þessi liður er svolítið erfiður í dag því það er aðallega eitthvað jákvætt að segja heilt yfir. Geggjað veður í Kaplakrikanum og áhorfendunum 111 til mikillar gleðiu var opnað yfir í gömlu stúkuna þar sem sólin skein og fólk hefur eflaust farið elgtanað heim. Þau örfáu sem völdu að vera í nýju stúkunni í skugganum fá vondan dag í dag, þið verðið að skella ykkur yfir til að fá D-vítamíniið. Dómarinn - 6 Keflavík vildi fá vítaspyrnu í blábyrjun leiksins og einnig seint í leiknum. Ég var sjálfur alls ekki sannfærður um að það hefði verið rétt og allt eins líklegt að Atli Haukur og hans teymi hafi dæmt rétt þarna. Fín dómgæsla en ég tek hann þó niður um einn fyrir kjánalega uppákomu undir lok fyrri hálfleiks. Þegar 9 sekúndur voru eftir af hálfleiknum sýndi Guðmundur Friðbertsson skiltadómari að 1 mínútu væri bætt við leiktímann, en í sömu andrá flautaði Atli Haukur hálfleikinn af. Hann sá þá skiltið uppi og hætti við að flauta af. Í kjölfarið var spiluð hálf mínúta, eflaust til málamynda og svo aftur flautað til hálfleiks.