Þjóðsöngvarnir að baki. Þeir voru frekar misheppnaðir svo ekki sé annað sagt. Stuðningsmenn Íslands voru að hrópa "Áfram Ísland!" þegar sá íslenski fór af stað. Fólk var ekki alveg að átta sig. Þegar franski þjóðsöngurinn var spilaður heyrðist svo svakalegt ískur.

Þetta er að bresta á! #fotboltinet pic.twitter.com/DjwX1naFxZ

— Fótbolti.net (@Fotboltinet) July 18, 2017

Úrslitin úr fyrsta leik C-riðils eru dottin í hús og þau voru áhugaverð. Austurríki vann granna sína í Sviss í alpaslagnum 1-0. En við pælum lítið í því. Það er leikurinn okkar gegn Frakklandi sem öllu skiptir.

Áhorfendur farnir að koma sér fyrir í stúkunni. Leikmenn eru að hita upp. Bubbi Morthens er á fóninum. Blindsker. Nú er komið að því að fara í tippkeppni meðal íslenskra fjölmiðlamanna. Hvernig fer:

Tómas Þór, 365: 4-1 sigur Islands.

Sindri Sverris, Mbl: 2-0 fyrir Frakkland.

Arnar Daði, Fótbolta.net: 0-0.

Bjarni Helgason, 433: 0-0.

Guðmundur Marinó, SportTv: 3-0 fyrir Frakkland.

Byrjunarliðið er komið inn
Freyr Alexandersson landsliðsþjálfari hefur tilkynnt byrjunarliðið en hann gerir eina breytingu frá byrjunarliðinu sem lék gegn Brasilíu og Írlandi í vináttulandsleikjum.

Dagný Brynjarsdóttir kemur inn í liðið og leikur sem fremsti leikmaður.

Fótbolti.net spáði því að Dagný yrði í nýju hlutverki í þessari stöðu og það reyndist rétt. Katrín Ásbjörnsdóttur náði ekki að skora í síðustu leikjum liðsins fyrir mótið og er sett á bekkinn.

Yngsti leikmaður hópsins, Agla María Albertsdóttir, heldur sæti sínu í byrjunarliðinu og er á hægri kantinum. Þessi 17 ára stelpa verður yngst Íslendinga til að spila á stórmóti í fótbolta.

Ingibjörg Sigurðardóttir er í vörninni og á miðjunni er Sigríður Lára Garðarsdóttir en auk Öglu Maríu eru þær allar þrjár að leika sinn fyrsta mótsleik fyrir íslenska landsliðið.

Íslenska liðið hefur ekki skorað mark í síðustu þremur leikjum sínum fyrir Evrópumótið og þá hefur Ísland aðeins skorað þrjú mörk á síðustu tveimur stórmótum.

Frakkland hefur að skipa frábæru varnarliði og það sýnir það til að mynda að liðið fékk ekki á sig mark í undankeppninni.

Sara Björk Gunnarsdóttir, fyrirliði Íslands:
Í seinustu leikjum höfum við skapað okkur færi og það er vel hægt að skora gegnum Frökkum. Þá bíður nýja kerfið okkar upp á að við getum skapað okkur færi. Við þurfum að nýta þau færi sem við fáum.

Brött brekka
Íslenska liðið er svo sannarlega litla liðið í þessum fyrsta leik sínum. Frakkland er með eitt sigurstranglegasta lið mótsins. Það er komið hingað til Hollands til að sækja gull.

Þó fáir hafi trú á sigri Íslands í kvöld hafa stelpurnar sjálfar verið óhræddar við að gefa það út að þær telji sig geta náð góðum úrslitum. Sama hvernig fer í þessum leik er ljóst að Ísland verður enn í möguleika á að komast upp úr riðlinum.

Landsliðsþjálfarinn Freyr Alexandersson sagði frá því á fréttamannafundi í gær að allir leikmenn hópsins væru klárir í slaginn.

"Það er ekkert grín að fá íslenska liðið í andlitið" segir @freyrale #fotboltinet pic.twitter.com/xgngLiaqj8

— Fótbolti.net (@Fotboltinet) July 17, 2017

Davíð Snorri Jónasson sá um að "skáta" franska liðið og fór á fjölmarga leiki hjá því í aðdragandanum. Við spurðum hann hvaða leikmenn Frakklands áhorfendur ættu að gefa gaum í leiknum.

Hvaða leikmönnum Frakklands eiga áhorfendur að gefa gaum á morgun? Við spurðum @davidsnorri að því #fotboltinet pic.twitter.com/9RDoXrgWM8

— Fótbolti.net (@Fotboltinet) July 17, 2017

Velkomin til leiks með Fótbolta.net á fyrsta leik Íslands á EM kvenna 2017 en leikurinn fer fram hér í Tilburg, á heimavelli Willem II.