Það fóru framhjá mér stór tíðindi úr herbúðum Vals en Málfríður Erna Sigurðardóttir er í leikmannahópi í dag. Málfríður ákvað í apríl að taka sér frí frá fótbolta og sagði hún ástæðuna vera minnkandi leikgleði. Nú er hún komin aftur í hópinn.

Þá eru byrjunarliðin klár. Þeir Donni og Pétur eru ekkert að flækja hlutina og stilla báðir upp óbreyttum liðum frá fyrri umferð. Í liði Vals er að sjálfsögðu Lillý Rut Hlynsdóttir en hún spilaði einmitt með liði Þór/KA hér áður fyrr. Þá er hún unga og efnilega Ólöf Kristín Sigurðardóttir á bekknum hjá Val en hún var fyrri hluta móts á láni hjá ÍA í Inkasso deildinni þar sem að hún stóð sig vel.

Þór/KA vann góðan 6-0 sigur gegn HK/Víking í síðustu umferð. Þar skoraði Sandra Stephany Mayor tvö mörk og þær Þórdís Hrönn Sigfúsdóttir, Lára Kristín Pedersen, Heiða Ragney Viðarsdóttir og Andrea Mist Pálsdóttir gerðu allar eitt mark.

Valur gerði sér góða ferð til Keflavíkur þar sem að þær sóttu 5-1 sigur gegn Suðurnesjastúlkum. Þær Fanndís Friðriksdóttir, Hlín Eiríksdóttir, Margrét Lára Viðarsdóttr, Dóra María Lárusdóttir og Málfríður Anna Eiríksdóttir sáu um að skora mörkin.

Þórdís Hrönn Sigfúsdóttir, leikmaður Þórs/KA, var í viðtali við Fótbolta.net fyrr í dag en þar talar hún meðal annars um að öll pressan sé á Val fyrir leikinn. Lesa má viðtalið með því að smella hér.

Þessi lið mættust í Mjólkurbikarnum fyrr í sumar í hörkuleik sem að endaði með 3-2 sigri Þór/KA en það er eini leikurinn sem að Valur hefur tapað í sumar. Sandra Stephany Mayor skoraði tvö og Lára Kristín Pedersen skoraði eitt fyrir Þór/KA á meðan að þær Margrét Lára Viðarsdóttir og Elín Metta Jensen skoruðu fyrir Val.

Hér er um að ræða alvöru stórleik. Heimakonur í Þór/KA sitja í þriðja sæti deildarinnar með 17 stig á meðan að Valur er í því fyrsta með 25 stig. Norðanstúlkur geta því minnkað forskotið niður í fimm stig með sigri hér í dag.

Komiði sæl og blessuð og veriði hjartanlega velkomin í þessa beinu textalýsingu á leik Þórs/KA og Vals í Pepsi Max-deild kvenna.