Þá leiðir Vilhjálmur Alvar liðin út á völl. Okkar allra besti dómari.

Varamennirnir lúðra boltum á markið, nú fer að styttast í að liðin láti sjá sig og undirritaður iðar á skinninu, þetta verður eitthvað!

Óskar Hrafn Þorvaldsson þjálfari Gróttu var að enda við að stilla upp glæsilegri Canon upptökuvél á svölunum hliðina á undirrituðum. Geri ráð fyrir að Hrafninn sitji sveittur yfir leikgreiningu í kvöld, hvernig sem leikurinn fer.

Gaman að segja frá því að undirritaður mætti með pakka af Extra tyggjói á Extra völlinn í kvöld. Fyndin tilviljun.

Liðin ganga út á völl í veðurblíðunni í Grafarvoginum. Ég er nokkuð viss um að það væru 300 gráður inni í fréttamannaboxinu ef það væri ekki opið í kringum hurðina en veðrið úti er öllu bærilegra. 16 gráður og glampandi sól.

Liðin eru eins og staðan er þessa stundina í 1. og 3. sæti deildarinnar þar sem Fjölnir er með 34 stig á toppnum á meðan að Grótta situr í 3. sæti með 30 stig. Þar á milli er Þór með 31 stig þannig að þessi leikur er gríðarlega mikilvægur fyrir bæði Gróttu og Fjölni í baráttunni um að komast upp í Pepsi-Max deildina.

Góðan og gleðilegan kæru lesendur. Ég býð ykkur hjartanlega velkomin í beina textalýsingu frá toppslagnum í Inkasso deildinni á milli Fjölnis og Gróttu, héðan af Extra vellinum í Grafarvogi.