Jæja þá ganga liðin út á völlinn. Allt klárt á Víkingsvelli sem hefur verið heimavöllur U21 landsliðsins í þessari undankeppni. Framundan eru þjóðsöngvarnir.

Þjálfarateymi Íslands fékk gagnrýni fyrir að tefla fram of sókndjarfri miðjusveit í tapinu í Svíþjóð. Alex Þór Hauksson, leikmaður Stjörnunnar, er nú kominn inn til að sinna varnarhlutverki á miðjunni.

Ég bjóst við því að sjá Finn Tómas Pálmason í byrjunarliðinu á kostnað Ara Leifssonar en Arnar heldur sér við sama miðvarðapar.

Ég ætla ekki að ljúga því að neinum að ég viti mikið um þetta írska lið en markvörður liðsins er allavega í herbúðum Liverpool.

Þá er áhugavert að Michael Obafemi, leikmaður Southampton, er að byrja sinn fyrsta U21 landsleik. Hann er samt búinn að spila fyrir A-landsliðið. Hann spilaði gegn Dönum í Þjóðadeildinni síðasta vetur.

Arnar Þór Viðarsson gerir tvær breytingar á byrjunarliðinu frá síðasta leik. Daníel Hafsteinsson og Mikael Neville Anderson fara út en sá síðarnefndi er meiddur.

Inn koma Alex Þór Hauksson og Hörður Ingi Gunnarsson.

Dómararnir í dag koma frá Moldóvu. Áhugavert er að aðaldómarinn Dumitri Muntean er að koma í annað sinn til Íslands í dómaraverkefni á þessu ári. Hann dæmdi leik Stjörnunnar og Espanyol í Garðabænum.

Sveinn Aron Guðjohnsen, leikmaður Íslands:
"Það er gott að fá leik svona strax á eftir. Við áttum bara lélegan leik gegn Svíþjóð. Það vantaði upp á allt hjá okkur í þeim leik. Við ætlum okkur í næsta leik og taka þrjú stig. Írarnir hafa verið góðir en mér finnst við eiga góða möguleika. Það sem ég hef séð þá tel ég okkur hafa betri leikmenn og vera betra lið."

Írska liðið er öflugt og vel spilandi. Það er ósigrað í riðlinum, er með tíu stig eftir fjóra leiki. Í síðustu viku gerði Írland markalaust jafntefli á heimavelli gegn Ítalíu.

Íslenska U21 landsliðið mætir því írska í undankeppni EM klukkan 15:00 á Víkingsvelli. Íslenska liðið er með sex stig að loknum þremur leikjum en á laugardag steinlá liðið 5-0 gegn Svíum. Liðið er væntanlega ákveðið í því að sýna í dag að sá leikur hafi verið slys!