Tveir leikmenn Blika eru heiðraðar fyrir leik. Kristín Dís fær viðurkenningu fyrir 100 meistaraflokksleiki fyrir Breiðablik og Berglind Björg Þorvaldsdóttir fær glæsilegan platta fyrir 200 leiki fyrir klúbbinn.

Þá munu leikmenn beggja liða leika með sorgarbönd í dag til minningar um Hendrik Skúlason, heiðursblika, sem lést á dögunum.

Það styttist í þetta og byrjunarliðin eru klár eins og sjá má hér til hliðar.

Þorsteinn Halldórsson gerir eina breytingu á liði Breiðabliks sem vann Selfoss í síðustu umferð. Hildur Antonsdóttir er meidd og spilar ekki í kvöld. Það kemur þó þungavigtarleikmaður í hennar stað. Rakel Hönnudóttir er búin að jafna sig af meiðslum og byrjar sinn fyrsta leik í sumar.

Jóhannes Karl þjálfari KR gerir tvær breytingar frá 3-1 tapinu gegn Fylki. Inga Laufey og Hlíf Hauks koma inn í liðið fyrir Ölmu Mathiesen sem fer á bekkinn og Önu Cate sem er ekki með í dag.

Nokkrir KR-inganna sem taka þátt í leiknum í dag þekkja vel til hjá Breiðablik. Jóhannes Karl Sigursteinsson þjálfari KR þjálfaði Breiðablik sumurin 2010 og 2011 og Þórdís Hrönn Sigfúsdóttir, leikmaður KR, var á mála hjá Blikum árin 2009-2013. Þá er markmannsþjálfarinn Gísli Þór Einarsson fyrrverandi leikmaður karlaliðs Blika og Guðlaug Jónsdóttir fyrrum landsliðskona og núverandi liðsstjóri KR á tvo stóra titla með Kópavogsliðinu.

Liðin hafa átt ólíku gengi að fagna í tveimur fyrstu umferðunum. Blikar hafa unnið báða sína leiki, gegn FH 3-0 og Selfossi 2-0. KR-ingar hafa hinsvegar tapað báðum sínum. Fyrst 3-0 gegn Val og svo 3-1 gegn Fylki.

Sjáum hvað gerist í kvöld en sagan er með heimakonum sem hafa unnið 9 af síðustu 10 viðureignum liðanna í efstu deild.

Góða kvöldið og verið hjartanlega velkomin í beina textalýsingu frá viðureign Breiðabliks og KR í 3. umferð Pepsi Max deildarinnar.

Bríet Bragadóttir flautar til leiks á Kópavogsvelli á slaginu 19:15.