Jæja. Liðin mætt út á völl. Veislan við það að hefjast!

Styttist í þetta. Blikar vökva vallarhelming Fylkis rækilega á meðan leikmenn leggja lokahönd á sinn undirbúning inni í klefa. Klassískt move og eldfljót sóknarlína heimakvenna mun eflaust njóta vel.

Það er aðeins farið að tínast í stúkuna og bæði lið njóta þess að hita upp fyrir þennan fyrsta leik tímabilsins. Spennan og eftirvæntingin er mikil!

Byrjunarliðin eru klár eins og sjá má hér til hliðar.

Hjá heimaliðinu fær Telma Ívarsdóttir traustið til að standa í markinu og nýliðarnir fá Selfossi, þær Karitas og Tiffany fara báðar beint í byrjunarliðið. Rétt eins og Andrea Rán sem er nýkomin heim frá Frakklandi þar sem hún hefur leikið með Le Havre á láni síðustu mánuði.

Ásta Eir Árnadóttir tekur við fyrirliðabandinu af Sonný Láru sem lagði hanskana og bandið á hilluna í haust.

Hjá Fylki spilar markvörðurinn ungi, Tinna Brá Magnúsdóttir, sinn fyrsta leik í efstu deild. Í byrjunarliðinu eru einnig þær Valgerður Ósk og Helena Ósk sem komu frá FH í vetur og nágranni þeirra úr Hafnarfirði, Sæunn Björnsdóttir sem kom á láni frá Haukum.

Jóhann Kristinn Gunnarsson knattspyrnuþjálfari hefur verið álitsgjafi Fótbolta.net um deildina undanfarin ár og hann var beðinn um að taka út lykilmenn og leikmenn sem gaman er að fylgjast með í liðunum.

Hjá Blikum kom ekki á óvart að Agla María Albertsdóttir var nefnd sem lykilkona. Það var hinsvegar áhugavert að hinir leikmennirnir sem nefndir voru eru nýliðar sem léku með Selfossi á síðasta tímabili. Þær Karitas Tómasdóttir og Tiffany McCarty. Það verður fróðlegt að sjá þær í grænu.

Jói mælti jafnframt með því að fylgjast með þeim Áslaugu Mundu Gunnlaugsdóttur og Hildi Þóru Hákonardóttur.

Hjá Fylki telur Jói að Tinna Brá Magnúsdóttir, Þórdís Elva Ágústsdóttir og Hulda Hrund Arnarsdóttir verði í lykilhlutverkum og mælir með að fólk fylgist með Bryndísi Örnu Níelsdóttur sem er mikill markaskorari sem gaman verður að fylgjast með taka næsta skref.

Þónokkrar breytingar hafa orðið á leikmannahópum beggja liða á milli ára. Byrjum á að kíkja á heimakonur í Kópavogi:

Þar urðu þjálfaraskipti þegar Þorsteinn Halldórsson tók við A-landsliðinu og Vilhjálmur Kári Haraldsson tók við skútunni.

Af leikmönnum eru fjölmargar horfnar á braut og munar þá mest um fimm byrjunarliðskonur: Alexandra Jóhannsdóttir í Eintracht Frankfurt, Berglind Björg Þorvaldsdóttir til Le Havre, Karólína Lea Vilhjálmsdóttir til Bayern Munchen, Sveindís Jane Jónsdóttir í Wolfsburg og Sonný Lára Þráinsdóttir sem er hætt.

Í staðinn eru mættar þær Birta Georgsdóttir, Karitas Tómasdóttir, Tiffany McCarty og Þórdís Hrönn Sigfúsdóttir. Þá eru þær Þórhildur Þórhallsdóttir, Ísafold Þórhallsdóttir, Telma Ívarsdóttir og Ásta Vigdís Guðlaugsdóttir allar komnar til baka eftir að hafa verið láni á síðustu leiktíð og freista þess nú að brjóta sér leið inn í Blikaliðið.

Hjá Fylki eru lykilkonur síðasta tímabils, þær Berglind Rós Ágústsdóttir og Cecilía Rán Rúnarsdóttir farnar í atvinnumennsku og Sólveig Larsen farin í Val eftir að hafa verið á láni.

Það hefur bæst vel við af efnilegum leikmönnum en þær Birna Dís Eymundsdóttir, Birna Kristín Eiríksdóttir, Emma Steinsen Jónsdóttir, Helena Ósk Hálfdánardóttir,
Karólína Jack, Sæunn Björnsdóttir, Tinna Brá Magnúsdóttir og Valgerður Ósk Valsdóttir eru allar mættar í Árbæinn. Þær Emma og Sæunn á láni.

Litla spennan og eftirvæntingin!

Pepsi Max fer af stað í kvöld og það með látum.

Verið velkomin í textalýsingu frá öðrum leik fyrstu umferðar. Stórleik Breiðabliks og Fylkis.

Blikar eru ríkjandi Íslandsmeistarar og Fylkir náði sínum besta árangri í fyrra þegar liðið tryggði sér 3. sæti deildarinnar.

Í ár eru flestir ef ekki allir miðlar að spá liðunum 2. og 3. sæti svo við skulum gera ráð fyrir toppleik.