Liðin ganga út á völlinn og Frikki Dór kynnir liðin. Eggert Gunnþór Jónsson mætir til leiks með sárabindi um höfuðið! Greinilega vel tekist á í upphituninni.

Leikmenn eru búnir að ljúka upphitun. Tómas Wolfgang Meyer er yfirmaður gæslunnar og er heldur betur tignarlegur.

Eftirlitsmaður KSÍ var að heimsækja fréttamannastúkuna í þeirri von að hér væri boðið uppá kaffi. Hann greip í tómt. Spurning hvort hann muni minnast á þetta í skýrslu sinni! Vonumst eftir því að kaffisendingin berist á endanum.

Fínt veður fyrir fótboltaleik. Völlurinn lítur fantavel út, hitastigið í kringum ellefu gráðurnar, skýjað en logn.

Byrjunarliðin eru komin inn.

Varnarmaðurinn Guðmann Þórisson tekur út leikbann og er Pétur Viðarsson í miðverði FH við hlið Guðmundar Kristjánssonar. Þórir Jóhann Helgason leysir af í hægri bakverði. Björn Daníel Sverrisson er í byrjunarliðinu en hann hefur verið mikið í umræðunni.

Elfar Árni Aðalsteinsson, sem skoraði sigurmarkið gegn Stjörnunni, byrjar á bekknum hjá KA.

Miðvörðurinn reynslumikli Guðmann Þórisson verður ekki með FH í dag. Guðmann hefur safnað fjórum áminningum og var úrskurðaður í bann á fundi aganefndar KSÍ í liðinni viku.

Markalaust í fyrra


Þegar liðin áttust við í Kaplakrika í fyrra enduðu leikar 0-0, vonandi er það ekki að fara að endurtaka sig. Liðin mættust ekki fyrir norðan þar sem tímabilið var flautað af vegna Covid-19 faraldursins.

2019 vann FH 3-2 sigur gegn KA í Krikanum og myndin hér að ofan er úr heimaleik KA sem Akureyrarliðið vann 1-0.

Frá aldamótum hafa liðin mæst 28 sinnum í leikjum á vegum KSÍ, FH hefur unnið 13, jafnteflin hafa verið 10 og KA sigrarnir alls 5 talsins.

KA er í þriðja sætinu


KA hefur verið að gera fína hluti undir stjórn Arnars Grétarssonar en liðið situr í þriðja sæti Pepsi Max-deildarinnar. Síðasti deildarleikur tapaðist, 0-1 gegn Val á Dalvíkurvelli, en KA klúðraði tveimur vítaspyrnum í leiknum.

Í vikunni vannst svo dramatískur 2-1 bikarsigur gegn Stjörnunni á útivelli þar sem Elfar Árni Aðalsteinsson skoraði sigurmarkið í uppbótartíma. Markið átti reyndar aldrei að standa þar sem boltinn var farinn afturfyrir í aðdragandanum en dómararnir brugðust.

Fyrsti deildarleikur FH undir Óla Jó


FH situr í sjötta sæti Pepsi Max-deildarinnar og hefur liðið verið í brasi á tímabilinu. Eftir 4-0 tap gegn Breiðabliki fyrir viku síðan var Logi Ólafsson látinn taka pokann sinn og Ólafur Jóhannesson var sóttur úr Pepsi Max-stúkunni á Suðurlandsbraut.

Ólafur Jóhannesson stýrði FH til fyrsta Íslandsmeistaratitils félagsins og vann fjóra titla með FH frá 2003-2007. Hann tekur við FH í fjórða sinn en hann kvaddi með fyrsta bikarmeistaratitli félagsins 2007 til að taka við íslenska landsliðinu.

Hann er nú mættur aftur í Kaplakrika og á að rétta skútuna við. Hans fyrsti leikur við stjórnvölinn í endurkominni var 4-1 bikarsigur gegn 2. deildarliði Njarðvíkur í vikunni.

Svona er tíunda umferðin spiluð.

sunnudagur 27. júní
16:00 FH-KA (Kaplakrikavöllur)
19:15 Valur-Fylkir (Origo völlurinn)
19:15 HK-Breiðablik (Kórinn)

mánudagur 28. júní
19:15 Leiknir R.-Víkingur R. (Domusnovavöllurinn)
19:15 ÍA-Keflavík (Norðurálsvöllurinn)
19:15 KR-Stjarnan (Meistaravellir)



Vonandi verður vel mætt á leikinn í dag en það er búið að afnema allar Covid-19 takmarkanir. Engin grímuskylda, hólfaskipting eða takmörkun á veitingasölu. Allir á völlinn!

Löggan flautar til leiks
Góðan og gleðilegan daginn, velkomin með okkur í Kaplakrika þar sem FH og KA eigast við í tíundu umferð Pepsi Max-deildarinnar. Lögregluvarðstjórinn Pétur Guðmundsson flautar leikinn á klukkan 16 en Oddur Helgi Guðmundsson og Andri Vigfússon eru aðstoðardómarar. Fjórði dómari er svo Vilhjálmur Alvar Þórarinsson.