Liðin ganga inn á völlinn. Framarar í stúkunni láta vel í sér heyra og klappa fyrir sínu liði, sem leikur í Pepsi Max-deildinni á næstu leiktíð.

Gary Martin að koma Selfossi í 2-0 þannig að útlitið er orðið ansi dökkt fyrir Þróttara. Þeir þurfa á sigri að halda í dag.

Smá tölfræðimoli rétt fyrir leik. Fram hefur spilað átta leiki í sumar og unnið þá alla. Markatala liðsins í þessum átta leikjum: 16-0.

Verður Þróttur fyrsta heimaliðið til að skora gegn Fram í sumar?

15 mínútna viðvörun

TÍÐINDI!
Gary Martin var að koma Selfossi yfir gegn Aftureldingu. Það er hálfleikur á Selfossi. Ef það endar þannig, þá er Þróttur átta stigum frá öruggu sæti!

BYRJUNARLIÐIN:
Liðin eru mætt út á völl og byrjunarliðin eru klár.

Þróttur gerir þrjár breytingar á liði sínu frá tapleiknum gegn Grindavík. Eiríkur Þorsteinsson Blöndal, Andi Hoti og Viktor Elmar Gautason koma inn í byrjunarliðið fyrir Alberto Carbonell Gomariz, Baldur Hannes Stefánsson og Hinrik Harðarson.

Hjá Fram kemur Danny Guthrie inn í byrjunarliðið fyrir Indriða Áka Þorláksson.

Það eru í gangi þrír leikir í Lengjudeildinni þessa stundina og þar á meðal er leikur Selfoss og Aftureldingar.

Það er væntanlega leikur sem Þróttarar horfa til í ljósi þess að Selfoss er næsta lið fyrir ofan, í öruggu sæti. Það eru fimm stig frá Þrótti í Selfoss.

Hægt er að fara í beina textalýsingu frá leik Selfoss og Aftureldingar hérna.

Ég er líklega hvað spenntastur samt að sjá Danny Guthrie í dag. Hann hefur komið við sögu í 12 leikjum í Lengjudeildinni í sumar.

Þar er á ferðinni leikmaður með mikla reynslu á stærsta sviðinu. Því allra stærsta.

Danny, sem er 34 ára, er mjög reyndur miðjumaður sem hefur leikið yfir 100 leiki í ensku úrvalsdeildinni og um 150 leiki í Championship deildinni. Hann hóf atvinnumannaferil sinn með Liverpool en er sennilega þekktastur fyrir tíma sinn hjá Newcastle og Reading.

Guthrie var leystur undan samningi við Blackburn Rovers 2017 og gekk árið eftir í raðir Mitra Kukar í Indónesíu. 2019-2021 lék fyrir Walsall í ensku D-deildinni. Hann lenti svo á Íslandi, óvænt, fyrir þetta tímabil.

Magnað lið Fram
Það er í raum ekki hægt að segja mikið meira en sagt hefur verið um þetta lið Fram.

Það eru öflugir leikmenn í öllum stöðum og þjálfararnir hafa unnið stórgott starf. Helst finnst mér Albert Hafsteinsson og Kyle McLagan hafa verið sterkir í sumar en það er í raun hægt að taka alla í liðinu og hrósa þeim.

Efnilegir leikmenn
Þróttur hefur verið að spila á nokkrum ungum leikmönnum í sumar. Nokkrir þeirra eru mjög spennandi.

Í síðasta leik, í tapi gegn Grindavík, var Baldur Hannes Stefánsson með fyrirliðabandið. Hann er fæddur árið 2002. Róbert Hauksson, strákur fæddur 2001, hefur fengið athygli fyrir góða frammistöðu og þá hefur Hinrik Harðarson skorað tvö mörk í 12 leikjum.

Hinrik er fæddur árið 2004 og er sonur Harðar Magnússonar, fyrrum markamaskínu sem lýsir núna fótboltaleikjum af stakri snilld á Viaplay. Hinrik á svo sannarlega framtíðina fyrir sér í fótboltanum.

Dómarinn
Dómari í dag er enginn annar en Vilhjálmur Alvar Þórarinsson. Einn besti dómari landsins á flautunni.

Honum til aðstoðar eru Antoníus Bjarki Halldórsson og Steinar Gauti Þórarinsson. Eftirlitsmaður er Sigursteinn Árni Brynjólfsson.

Framarar tryggðu sér sæti í Pepsi Max-deildinni í síðustu viku, með 2-1 sigri gegn Selfossi á heimavelli. Þeir geta tekið því rólega í síðustu leikjunum en ég efast um að þjálfarar og leikmenn liðsins vilji það.

Fram hefur verið algjört yfirburðarlið í sumar og ekki enn tapað leik.



Það hefur ekki gengið eins vel hjá Þrótti. Þeir eru í fallsæti, fimm stigum frá öruggu sæti. Þeir þurfa að fara að ná í jákvæð úrslit ef þeir ætla sér ekki að vera í 2. deild á næstu leiktíð.

Góðan daginn og verið velkomin í beina textalýsingu þar sem fram fer leikur Þróttar og Fram í Lengjudeild karla.

Endilega fylgist með!