Búið að rigna talsvert en hann helst þurr í augnablikinu. Nokkuð stíf sunnanátt beint á völlinn. Völlurinn vísast þungur og blautur. Ólíklegt að hér fari fram fallegur knattspyrnuleikur.

Byrjunarliðin eru komin inn, ekkert sem ætti að koma sérstaklega á óvart þar.

Leiknum hefur verið frestað um klukkustund, til kl.15:00, Þór er á leiðinni með flugi að norðan.

Fyrri leikur liðanna í deildinni endaði 1-1 fyrir norðan, en Vestri vann svo stórsigur á Þór í bikarnum á þessum velli fyrir tæpum mánuði, lyktir urðu 4-0 þar sem Nicolaj Madsen setti tvö mörk beint úr aukaspyrnu. Vestri vann báða deildarleikina í fyrra þannig að það má segja að þeir séu með tak á Þórsurum.

Í liði Þórsara er einn leikmaður á heimaslóðum, en markvörðurinn Daði Freyr kom upp í gegnum unglingastarfið hér og lék meistaraflokksbolta með BÍ/Bolungarvík og Vestra milli 2015-2018.

Dómari leiksins er Einar Ingi Jóhannsson sem er að jafnaði dómari í efstu deild. Leikir milli þessara liða hafa oft reynst eldfimir og dugar ekkert minna en að fá dómara að ofan.

Lið að vestan hefur ekki endað fyrir ofan Þór á Íslandsmóti karla í knattspyrnu í 39 ár. En árið 1982 lenti ÍBÍ í 6. sæti efstu deildar á meðan Þór var í öðru sæti í deildinni fyrir neðan. Sú eyðimerkurganga gæti endað hér í dag með sigri heimamanna eða jafntefli, en þá yrði ljóst að Þór gæti ekki náð Vestra að stigum. Hvenær Ísfirðingar eða nærsveitungar enduðu fyrir ofan Þór í sömu deild, þyrfti að leita til eldri manna, ekki finnst það á vefnum.

Þór getur fellt Þrótt nái þeir í stig hér í dag. Markatala Þróttara er mun verri, en allt getur gerst og vilja Akureyringar eflaust gulltryggja veru sína í deildinni sem allra fyrst.

Velkomin í beina textalýsingu frá leik Vestra og Þórs í Lengjudeild karla. Vestri er í 6. sæti með 29 stig og Þór er í 10. sæti 20 stig.