Liðin mætt á teppið.

Blikar eru í sínum hefðbundna grænhvíta en Valsmenn eru í lit sem ég hef ekki séð.

Blásvarfjallröndóttar peysur, svartar stullur og svartir sokkar. Mæli með þið kíkið hingað bara fyrir búninginn!

Það verður að gleðjast yfir því að hér er stúkan hreinlega að fyllast.

Það var einstaklega gaman að sjá fólk hér fyrir leik brosandi og kátt á leið á fótboltaleik. Laugardagskvöld er góður tími sýnist manni fyrir toppleik í íslenskum fótbolta.

Umboðsmaður Íslands, Magnús Agnar Magnússon - áður penni á vefsíðunni www.kop.is - er sestur í sætið sitt eftir veru í VIP-stúkunni.

Maðurinn er einstaklega vel útlítandi að venju. Geitin úr Vesturbænum að skanna markaðinn.

Að venju þá er möguleiki á að skutlast inn hér í lýsinguna með því að skella myllumerkinu #fotboltinet í tíst á twitter.

Það er afar skemmtilegt að fá krydd utan úr bæ í tilveruna í fréttamannaherberginu á Kópavogsvelli.

Frá því upphitunin var gjörð í morgun hafa breyst forsendur.

Víkingar og KR unnu sína leiki þannig að fyrir þennan leik eru þá Blikar í 2.sæti og Valsarar komnir niður í 5.sæti. Það eru stór högg þessa dagana!

Heimir Guðjónsson gerir þrjár breytingar á liði Vals en Blikaliðið er óbreytt frá síðustu viðureign.

Sverir Páll Hjaltested, Christian Köhler og Sigurður Egill Lárusson koma allir á bekkinn hjá Val en þeir Haukur Páll Sigurðsson, Patrick Pedersen og Almarr Ormarsson koma inn.

Dómarateymi kvöldsins er ekki af verri endanum.

Þorvaldur Árnason er með flautuna, honum til aðstoðar með flögg og höfuðhljóðbúnað eru Jóhann Gunnar Guðmundsson og Ragnar Þór Bender.

Fjórði dómarinn er Ívar Orri Kristjánsson og eftirlitsstörfum sinnir Hjalti Þór Halldórsson.

Allt klárt hér.

Þjálfararnir hafa svo auðvitað KR tengingu enda léku bæði Óskar Hrafn Þorvaldsson Bliki og Heimir Guðjóns nú Valsari með langröndóttum Vesturbæingum á síðustu öld.

Þegar við skoðum tengingar í leikmannahópum liðanna þá finnum við einungis Anton Ara Einarsson markvörð Blika sem lék með Valsmönnum milli áranna 2014 og 2019 og vann þar titla.

Þegar við horfum á síðustu 10 leiki þá er sveiflan enn sterkari með Völsurum.

Af þeim hafa Valsmenn unnið 6 leiki en Blika 2 leiki. Markatalan í þeim er 17 - 13 fyrir Val.

Valsmönnum hefur gengið sérlega vel í Kópavoginum á þessum tíma, ósigraðir í síðustu fimm heimsóknum þangað. Síðasti sigur Blika á Val í Kópavogi var í maímánuði 2015 þegar Höskuldur Gunnlaugsson, nú fyrirliði Blika, skoraði framhjá Ingvari Kalé í marki Vals og tryggði heimasigur.

Ef við skoðum fyrri leiki þessara liða í efstu deild þá er leikurinn í dag númer 70 í þeirri röð.

Sá fyrsti var á því merka ári 1971 á Melavellinum og lauk með 2-0 óvæntum sigri nýliða Breiðabliks á risaliði Vals á þeim tíma með mörkum Magnúsar Steinssonar úr víti og Guðmundar Þórðarsonar í blálokin. Heljarfyrirsagnir í blöðunum hóf því þann viðureignaferil.

Frá því í júní 1971 hafa Valsmenn unnið 29 leiki og Blikar 24 stykki, 16 sinnum hefur orðið jafntefli. Markatalan í þeim leikjum er 110 - 97 Valsmönnum í vil.

Bæði lið hafa úr öllum sínum leikmannahópi að ráða.

Engin meiðsl eða bönn að stríða og allir landsliðsmenn liðanna koma heilir úr verkefnunum.

Það hjálpar til við skemmtunina að allir séu með.

Fyrri leik liðanna í sumar lauk með 3-1 sigri Valsmanna í hörkuleik.

Eitt marka Vals var sjálfsmark en Patrik Pedersen og Guðmundur Andri Tryggvason skoruðu einnig. Árni Vilhjálmsson skoraði sárabótarmark fyrir Blika.

Eftir öfluga byrjun hafa Valsmenn lent á vegg.

Þeir hafa nú tapað þrem af síðustu fimm leikjum sínum og ef þeir tapa leiknum við Blika í dag gætu þeir verið í 5.sæti að þessari umferð lokinni og þá ekki í Evrópusæti einu sinni.

Ef deildinni er stillt upp af útileikjum væru Valsmenn í 6.sæti deildarinnar, þar hafa þeir tapað fjórum af sínum níu leikjum.

Blikar sitja efstir í deildinni fyrir leikinn með 41 stig og hafa unnið síðustu fimm leiki sína.

Eftir að þeir töpuðu fyrsta heimaleiknum þann 2.maí fyrir KR hafa þeir unnið alla heimaleiki sína. Í þeim 8 sigurleikjum er markatala þeirra á Kópavogsvelli 26 - 1.

Svo...getum við ekki kallað völlinn ágætis gryfju?

Hér er um sannkallaðan risaleik að ræða í tuttugustu umferð PepsiMax deildarinnar.

Blikar taka risaskref í átt að Íslandsmeistaratitli með sigri og Valsmenn verða að vinna þennan leik til að eiga möguleika á að halda titlinum á Hlíðarenda.

Góðan daginn og hjartanlega velkomin í beina textalýsingu frá Kópavogsvelli þar sem Blikar fá Valsmenn í heimsókn.

Hér er stórleikur á ferð!