Endilega verið með okkur í gegnum Twitter með því að nota kassamerkið #fotboltinet

Verið er að leika þjóðsöngvana. Íslendingar eru alhvítir í dag, hvítar treyjur, hvítar buxur og hvítir sokkar.

Heimilislegt í HM-stofunni á RÚV þar sem Einar Örn Jónsson er í inniskónum að ræða við Margréti Láru og Arnar Gunnlaugs.

Rúmenska bjórverksmiðjan Timisoreana, sem er einn helsti styrktaraðili rúmenska landsliðsins, keypti auglýsingu á stóru skilti í Skopje í Norður-Makedóníu með skilaboðum til Arnars Þórs Viðarssonar, landsliðsþjálfara Íslands.

Eftir leikinn gegn Rúmeníu á fimmtudag sagði Arnar á fréttamannafundi að hann vildi fá bjór fyrir að gera Rúmenum greiða með því að taka eitthvað af Makedónum.

Ari Freyr Skúlason meiddist í leiknum gegn Rúmenum og er því ekki með í leiknum í dag. Er utan hóps. - Birkir Bjarna er í byrjunarliðinu svo hann mun slá landsleikjamet Rúnars Kristinssonar í dag. Landsleikur númer 105. Glæsilegt.

Byrjunarlið Íslands.

Það eru tvær breytingar á íslenska liðinu frá síðasta leik, í bakvarðastöðunum. Birkir Már og Gummi Tóta koma inn fyrir Alfons og Ara Frey.

Miðað við könnun sem verið hefur á forsíðu búast lesendur Fótbolta.net við jöfnum leik í dag. Arnar Viðars talaði sjálfur um að leikurinn yrði væntanlega frekar lokaður og lítið um marktækifæri.

"Við óskum ykkur alls hins besta en við munum reyna eyðileggja fyrir ykkur á morgun," sagði Arnar Viðarsson landsliðsþjálfari Íslands á fréttamannafundi í gær.

"Þegar þú ert með hóp af 'professional' leikmönnum þá ertu alltaf mótiveraður í alla leiki. Við erum með ungan hóp, nýja leikmenn og því eru þessir leikir mjög mikilvægir í þróun liðsins. Það skiptir ekki máli þó við eigum ekki séns á öðru sætinu þá erum við samt hungraðir í að vinna leikinn," sagði Arnar þegar hann var spurður að því hvort liðið væri mótverað í leikinn.

Þið spilið á morgun undir engri pressu, hvað munið þið gera öðruvísi heldur en þið gerðuð í fyrri leiknum?

"Við erum að reyna spila þetta nýja lið saman, búa til það sem við höfðum áður. Við erum að reyna skapa það aftur og til þess þurfa leikmenn að spila saman. Það eru ekki margir hlutir sem við munum gera öðruvísi. Við erum að reyna vera betri í öllu því sem við erum að gera, alveg eins og þeir með sinn nýja þjálfara," sagði Arnar.

Ísland gerði 0-0 jafntefli gegn Rúmeníu ytra á fimmtudaginn síðasta. Arnar var heilt yfir sáttur með þann leik þó hann hefði viljað stigin þrjú.

"Vorum ánægðir með varnarleikinn heilt yfir, jákvætt að halda hreinu og Rúmenarnir voru í vandræðum með að brjóta okkur niður, það var helst eftir einstaklingsmistök hjá okkur eða eftir horn. Við sköpuðum okkur 4-5 færi og vorum svekktir með að vinna ekki leikinn. Það mest jákvæðasta úr þessu var að menn voru svekktir að ná ekki í öll þrjú stigin."

Birkir slær landsleikjametið í dag


Birkir Bjarnason jafnaði landsleikjamet Rúnars Kristinssonar í markalausa jafnteflinu gegnu Rúmeníu á fimmtudag en hann ræddi við RÚV eftir leikinn. Birkir spilaði sinn fyrsta landsleik árið 2010, þá 22 ára gamall.

"Jú, þetta er mjög stórt fyrir mig og mína fjölskyldu og ótrúlega stoltur af því og vonandi get ég haldið áfram og fengið enn fleiri leiki," sagði Birkir við RÚV.

"Nei, ég get ekki sagt það. Ég hef aldrei pælt mikið í þessu fyrr en maður var rétt að skríða yfir hundrað leiki. Þetta var aldrei markmið eða neitt svoleiðis, bara ótrúlegur plús að geta komist hingað."

Ísland og Norður-Makedónía hafa mæst fimm sinnum áður í A landsliðum karla. Einu sinni hefur Ísland unnið sigur, einu sinni gerðu liðin jafntefli og N-Makedónar hafa unnið tvisvar.

Þegar liðin mættust í byrjun september á Laugardalsvelli enduðu leikar 2-2 eftir að gestirnir komust í tveggja marka forystu.

Ísland 2 - 2 Norður-Makedónía
0-1 Darko Velkoski ('12 )
0-2 Ezgjan Alioski ('55 )
1-2 Brynjar Ingi Bjarnason ('78 )
2-2 Andri Lucas Guðjohnsen ('84 )
Lestu um leikinn

Staðan fyrir lokaumferðina


17:00 N-Makedónía - Ísland
17:00 Armenía - Þýskaland
17:00 Liechtenstein - Rúmenía

Allir leikir riðilsins hefjast á sama tíma. Þjóðverjar eru öruggir með efsta sætið og þar með sæti í úrslitakeppni HM 2022 í Katar, en baráttan um annað sætið er fyrst og fremst á milli Norður-Makedóníu og Rúmeníu, þó Armenía eigi enn tölfræðilega möguleika. Ísland er með 9 stig og getur með sigri komist upp fyrir Armeníu, ef Armenar tapa sínum leik.

Góðan og gleðilegan leikdag!

Það er komið að síðasta leik Íslands í undankeppni HM og hann fer fram í Skopje, höfuðborg og stærstu borg Norður-Makedóníu. Ítalski dómarinn Davide Massa flautar til leiks klukkan fimm. Massa hefur dæmt ýmsa stórleiki í ítölsku A-deildinni og einnig dæmt í Meistaradeild Evrópu.