Liðin eru að labba inn á völlinn þannig þetta fer að bresta á!

Spánverjar gera 10 breytingar frá síðasta leik takk fyrir pent.

Luis Enrique, þjálfari spænska landsliðsins, hefur valið byrjunarliðið fyrir leikinn gegn Íslandi sem hefst eftir um klukkutíma.

Í byrjunarliðinu má sjá þekkt nöfn eins og Alvaro Morata, Cesar Azpilicueta, Aymeric Laporte og Jordi Alba. Þar eru þó einnig minna þekkt nöfn eins og Yéremy (Villarreal), Carlos Soler (Valencia) og Hugo Guillamón (Valencia).

Alvaro Morate leiðir framlínuna en hann er eini leikmaðurinn í byrjunarliðinu sem byrjaði í 2-1 sigrinum gegn Albaníu á laugardag.

Ein breyting er á liði Íslands sem mætir Spáni klukkan 18:45 frá leiknum gegn Finnlandi á laugardag. Aron Elís Þrándarson kemur inn í liðið fyrir Arnór Sigurðsson.

Birkir Bjarnason spilar í kvöld sinn 107. leik fyrir landsliðið og er langleikjahæstur í liðinu. Næstur á eftir Birki er Jón Daði Böðvarsson með 63 leiki og þar á eftir kemur Hörður Björgvin Magnússon með 37 leiki.

Byrjunarlið Íslands:
1. Rúnar Alex Rúnarsson (m)
2. Alfons Sampsted
5. Brynjar Ingi Bjarnason
14. Daníel Leó Grétarsson
23. Hörður Björgvin Magnússon
15. Aron Elís Þrándarson
8. Birkir Bjarnason
16. Stefán Teitur Þórðarson
11. Jón Dagur Þorsteinsson
20. Þórir Jóhann Helgason
22. Jón Daði Böðvarsson

Birkir Bjarna: Framtíðin er mjög björt

,,Það er mikilvægt að mæta góðum liðum líka. Þetta er gríðarlega mikil reynsla fyrir þessa ungu stráka að spila á móti bestu leikmönnum í heimi."

,,Ég er viss um að þessir strákar eigi eftir að læra mikið og þá sérstaklega varnarlega. Það er mikilvægt að fá þessa leiki og við erum ekki hérna til þess að tapa leikjum fyrir fram," sagði Birkir.

,,Við erum með mjög ungt lið, reynslulítið en við höfum áfram leikmenn í liðinu sem voru í hópnum á EM og HM. Ég held að þetta sé mjög mikilvægur tími fyrir okkur að læra hvernig það er að spila alþjóðlegan fótbolta. Mér finnst við vera í jákvæðum farvegi og erum að verða betri í hvert skipti sem við hittumst. Framtíðin er mjög björt."

Arnar á fundi fyrir leik: Hægt að ná í úrslit gegn Spáni

,,Við vitum að spænska liðið mun vera meira með boltann og markmiðið er að þróa okkar varnarleik á móti liði sem spilar öðruvísi fótbolta en Finnland. Við þurfum að gera þetta [að spila á móti mismunandi andstæðingum] til að móta okkar unga lið því ef þú spilar einungis á móti bestu liðunum þá verður erfitt að þróa liðið. Á morgun er mikilvægt að reyna ná okkar markmiðum á móti liði í heimsklassa eins og Spánn er með."

,,Við sáum síðasta leik Spánar og greindum hann. Það var mikilvægt fyrir okkur að sjá þann leik því við mætum Albaníu í Þjóðadeildinni í sumar. Við vorum ekki bara að fylgjast Spáni heldur líka Albaníu í þeim leik. Albanir gerðu nokkuð vel en það er ekki bara Albanía sem getur gert Spáni lífið leitt."

,,Við höfum séð Svíana gera það á síðustu mánuðum og ég sá Kósóvó og Georgíu einnig gera Spáni erfitt fyrir. Við vitum um styrkleika spænska liðsins en við vitum líka hvar við getum sótt á þá. Mikilvægast er samt þróunin á okkar leik og okkar hugmyndafræði - horfa í okkar eigin styrkleika."

Rúmenskur dómari dæmir leikinn í kvöld, sá heitir Horatiu Mircea Fesni og er 32 ára gamall.

Góðan daginn lesendur góðir og veriði velkomnir í beina textalýsingu frá leik Spánar og Íslands sem fram fer á Riazor leikvangingum í Coruna.

Liðin hafa mæst níu sinnum áður í gegnum árin, síðast í undankeppni fyrir EM 2008. Spánn er með eitt besta landslið heims og hefur unnið sex af leikjunum níu. Ísland hefur unnið einu sinni (á Laugardalsvelli 1991) og tvisvar hefur orðið jafntefli milli liðanna.

Leikurinn er seinni leikur Íslands í þessum landsleikjaglugga. Liðið gerði 1-1 jafntefli við Finnland á laugardag.

Smelltu hér til að lesa um leikinn gegn Finnlandi

Leikurinn er í beinni útsendingu á Stöð 2 Sport og hefst klukkan 18:45.

Riazor leikvangurinn