Allt til reiðu hér í Safamýri og liðin að búa sig undir að ganga til vallar. Alvöru Reykjavíkurslagur framundan og spenna í loftinu.

Vonumst að sjálfsögðu eftir spennandi og góðum leik.

Byrjunarliðin eru mætt í hús og má sjá hér til hliðar. Stefan Alexander Ljubicic leiðir framlínu KR í fjarveru Kjartans Henry og Kristjáns Flóka en Sigurður Bjartur er á bekknum.

Danski Kongómaðurinn Delphin Tshiembe kemur beint inn í liðið en Hlynur Atli er á bekknum. Þá er Janik Pohl hvergi sjánlegur á skýrslu en hann mun hafa náð nokkrum góðum æfingum fyrir mót en er eflaust ekki klár í slaginn.

Tríóið

Lögregluvarðstjórinn Pétur Guðmundsson er með flautuna í kvöld og ætti leikurinn því að vera í góðum höndum.
Eðvarð Eðvarðsson og Sveinn Þórður Þórðarson eru honum til aðstoðar auk Arnars Inga Ingvarssonar sem er varadómari

Eftirlitsmaður KSÍ er síðan séntilmaðurinn og lífskúnsterinn Hjalti Þór Halldórsson.

Spámaður umferðarinnar

Spámaður fyrstu umferðar Bestu deildarinnar hjá okkur á Fótbolta.net er hin óviðjafnanlegi Pape Mamadou Faye.
Um leik Fram og KR sagði Pape.

,,Reykjavíkurslagurinn, tveir kóngaklúbbar að mætast í fyrsta leik. Þetta verður skemmtilegasti leikurinnn í umferðinni. Framarar hafa sýnt það síðustu árin að þeir eiga heima í efstu deild en hafa ekki verið sannfærandi í vetur. Það skiptir kannski ekki öllu málið þegar í sumarið er komið hvernig þú stendur þig á undirbúningstímabilinu. Við höfum séð lið brillera um veturinn og ekkert getað í Íslandsmótinu. Ég er spenntur að sjá Fram í sumar. Þetta er fyrsti leikur og því fylgir spenna, sérstaklega þegar þú ert nýkominn upp. KR er aftur á móti með skýrt markmið að berjast um titilinn. Ég held að þetta verði 1-1 fram á 70. mínútu og svo klára reynsluboltarnir úr Vesturbænum þetta.''

Fram

Fram er mætt í Bestu deildina eftir að hafa dvalið síðustu sjö tímabil í þeirri næst efstu. Undir dyggri stjórn Jóns Sveinssonar rúlluðu Safamýrarpiltar ( í nokkrar vikur enn) yfir Lengjudeildina og fóru taplausir í gegnum leikina 22.

Við hér á Fótbolta.net erum þó ekkert sérlega bjartsýnir fyrir hönd Fram og spáum þeim 12. og neðsta sæti deildarinnar. Missirinn í Kyle McLagan er svakalegur á pappírunum. Hann gerði alla í kringum sig betri og verður fróðlegt að sjá hvernig Nonni nær að leysa varnarleik liðsins án Kyle.

Komnir
Jannik Pohl frá Danmörku
Jesús Yendis frá Venesúela
Tiago Fernandes frá Grindavík
Delphin Tshiembe
Hosine Bility

Farnir
Danny Guthrie
Kyle McLagan til Víkings R.
Haraldur Einar Ásgrímsson í FH

KR

Svarthvítum lærisveinum Rúnars Kristinssonar er spáð 5.sæti af okkur hér á Fótbolta.net. Eflaust alls ekki það sem KR stefnir á enda yfirlýst markmið í Vesturbænum að berjast um alla þá titla sem í boði eru.

Reynslan í KR liðinu er mikil en á móti kemur að breiddin er ekki sú mesta í deildinni og gæti liðið lent í vandræðum ef menn meiðast eða lenda í spjaldaveseni.

KR verður án Kjartans Henrys Finnbogasonar í leiknum í kvöld en hann á enn eftir að afplána tvo leiki í bann fyrir rauða spjaldið sem hann hlaut gegnn Víkingum í 21.umferð í fyrra.

Komnir
Aron Kristófer Lárusson frá ÍA
Aron Snær Friðriksson frá Fylki
Finnur Tómas Pálmason frá Svíþjóð
Hallur Hansson frá Vejle
Sigurður Bjartur Hallsson frá Grindavík
Stefan Alexander Ljubicic frá HK

Farnir
Alex Freyr Hilmarsson í ÍBV
Arnþór Ingi Kristinsson hættur
Aron Bjarki Jósepsson í ÍA
Guðjón Baldvinsson hættur
Guðjón Orri Sigurjónsson í ÍBV
Óskar Örn Hauksson til Stjörnunnar

Það er helst nafn Halls Hanssonar fyrirliða Færeyinga sem kallar á mann á komnir/farnmir listanum. Finnur Tómas er á listanum líka en hann lék með liðinu bróðurpart síðasta tímabils sömuleiðis. Hafandi fylgst með Sigurði Bjarti Hallsyni síðustu ár í Grindavík er ég spenntur að sjá hvað sveitastrækerinn getur fært KR en hann er lúsiðinn framherji sem er einkar lunkinn að finna sér færi.

Velkomin til leiks

Kæru lesendur, ballið er byrjað. Besta deildin 2022 hefur rúllað af stað og framundan er vonandi magnað sumar. Framundan er Reykjavíkurslagur þegar Fram og KR leiða saman hesta sína og það allt í beinni textalýsingu hér á Fótbolti.net