Ákaflega ánægjulegt að sjá að Brenton Muhammad, sem jafnan er aðalmarkvörður Vestra er kominn á bekkinn. Brenton hefur ekkert verið með í ár vegna hjartavesens.

Töluvert meiri vindur en leit út fyrir í dag, stíf norðan átt beint á völlinn sem gæti haft áhrif á framvinduna.

Ákaflega ánægjulegt að Vestri tekur skref í framtíðina með að skipta um marknet, eru komnir með blá net. Reyndar ennþá sömu 80's mörkin með stangir að innan en allavega gott og mikilvægt skref, segi ég sem áhugamaður um fótboltamörk.

Liðin eru klár. Vestri voru í miðvarðaveseni í síðasta leik, tveir meiddir útaf og miðjumenn leystu af. En Elmar og Friðrik eru klárir og enginn í framandi stöðum.

Grindavík hefur farið vel af stað og eru eina taplausa liðið í deildinni með 3 sigra og 4 jafntefli í fyrstu sjö leikjunum. Með sigri í dag komast þeir í annað sætið. Vestri fóru rólega af stað en náðu sterkum útisigri gegn Fjölni í síðustu viku og með sigri í dag komast þeir í seilingarfjarlægð við toppsætin.

Arnar Ingi Ingvarsson, lögmaður dæmir þennan leik. Bæði lið vilja snúa aftur í efstu deild sem fyrst og alla vega vera í toppbaráttunni í sumar. Vestri, sem þá hét Íþróttabandalag Ísafjarðar féll úr efstu deild síðast 1983 og Grindavík féll árið 2019.

Liðin mættust tvisvar á síðustu leiktíð eins og oft vill verða. Grindavík vann hér á Olísvellinum 3-2 en Vestramenn sóttu þrjú stig til Grindavíkur með 2-1 sigri þar.

Góðan laugardag og verið velkomin í beina textalýsingu á leik Vestra og Ungmennafélags Grindavíkur. Fínasta veður í dag, sól og lítill vindur.