Liðin ganga til vallar Okkur er ekkert að vanbúnaði hér í Keflavík. Liðin hafa gengið til vallar og allt til reiðu hér til að leikar hefjist.

Örlítil seinkunn Vegna framlengingar í leik Stjörnunar og ÍBV seinkar upphafsflautinu hér um 5 mínútur samkvæmt mínum upplýsingum. Það er tilkomið vegna sjónvarpsútsendingar frá leiknum í Garðabæ sem og hér en báðir leikir eru í beinni á Rúv 2

Dómari Jóhann Ingi Jónsson heldur um flautuna í Reykjanesbæ í kvöld. Honum til aðstoðar eru þeir Kristján Már Ólafs og Jakub Marcin Róg. Bríet Bragadóttir er fjórði dómari og eftirlitsmaður KSÍ er Þórður Georg Lárusson.

Leikstaður Leikurinn fer fram á gervigrasvellinum við hlið Reykjaneshallarinnar líkt og deildarleikur Keflavíkur á dögunum. Þar hefur verið útbúin ágætis áhorfendaaðstaða og ekki úr vegi fyrir fólk að gera sér ferð á völlinn. Vissara þó að klæða sig vel.

Fyrri viðureignir í bikar Sextán sinnum hafa liðin barist innbyrðis í Bikarkeppninni og hallast tölfræðin heldur upp á Akranes. ÍA hefur fagnað sigri tíu sinnum alls, Keflavík fimm sinnum og einn leikur er skráður jafntefli það herrans ár 1965. (Á þeim tíma var leikur endurtekinn ef um jafntefli var að ræða og mættust liðin aftur viku síðar þar sem ÍA hafði sigur.)

Skagamenn hafa líka átt ögn greiðari leið að marki Keflavíkur en öfugt og er markatala 29-17 gulum í vil.

Síðast mættust liðin í Mjólkurbikarnum í undanúrslitum árið 2021 þar sem að ÍA hafði 2-0 sigur.

ÍA Skagamenn sem leika sinn annan leik í Mjólkurbikarnum þetta árið tryggðu sér sæti í 32 liða úrslitum með sigri á öðru Suðurnesjaliði en þeir lögðu Víði frá Garði 3-0 í Akraneshöllinni í upphafi mánaðarins þar sem Arnór Smárason, Haukur Andri Haraldsson og Viktor Jónsson sáu um markaskorun fyrir ÍA.
Skagamenn voru síðast í bikarúrslitum 2021 þar sem þeir lutu í gras gegn Víkingum en biðin eftir sigri í bikarnum er ögn lengri. Síðast fagnaði ÍA sigri í kepnninni árið 2003 eða fyrir tuttugu árum síðan.

Keflavík Keflavík mætir til leiks í kvöld í 32 liða úrslitum líkt og önnur lið í Bestu deildinni. Vegferð liðsins í bikarnum í fyrra var styttri en vonir stóðu til en liðið féll út strax í 32 liða úrslitum það árið með 1-4 tapi gegn grönnum sínum í Njarðvík. Markmiðið eflaust að gera betur að þessu sinni en níu ár eru síðan Keflavík komst síðast í bikarúrslit og sautján ár síðan liðið fagnaði síðast sigri í keppninni.

Mjólkurbikarkvöld

Heil og sæl kæru lesendur og verið hjartanlega velkomin í þessa beinu textalýsingu Fótbolta.net frá leik Keflavíkur og ÍA í 32 liða úrslitum Mjólkurbikars karla.