Liðin ganga til vallar Þetta fer að bresta á. Vonumst að sjálfsögðu eftir skemmtilegum og spennandi leik.

Byrjunarliðin dottin inn fyrir lifandis löngu. Borgarinn og spekingarnir hér í Víkinni gleðja og urðu til þess að ég steingleymdi að setja liðsfærsluna hér inn tímanlega.

Bæði lið gera fjórar breytingar á liði sínu frá síðasta leik. Til að stikla á stóru eru fréttirnar þær að Erlingur Agnarsson er mættur aftur í byrjunarlið Víkinga eftir meiðsli. Annað getum við flokkað undir eðlilega róteringu hjá Arnari til að halda mönnum ferskum enda spilað þétt þessa stundina.

Hjá Keflavík er eitthvað um meiðsli. Ásgeir Páll þurfti að yfirgefa völlinn gegn ÍBV vegna meiðsla og er ekki með í dag. Þa er Stefán Ljubicic ekki með heldur en það er gleðiefni fyrir Keflvíkinga að Frans Elvarsson er leikfær og byrjar í dag.

Fyrri viðureignir í efstu deild frá aldamótum. Átján sinnum hafa liðin mæst innbyrðis í A-deild frá aldamótum. Tíu sinnum hafa Víkingar haft sigur, Keflavík hefur unnið sex leiki og tveimur leikjum hefur lokið með jafntefli. Markatalan í viðureignum liðana er svo 36-19 Víkingum í vil.

Þó aðeins muni fjórum sigrum á liðunum frá aldamótum er langt í frá öll sagan sögð þar. Víkingar hafa unnið átta viðureignir í röð eða allt frá lokaumferð tímabilsins 2014 þegar Keflavík hafði 2-0 sigur á heimavelli. Í þokkabót hafa Víkingar gert 25 mörk í þessum átta sigrum gegn aðeins 4 Keflvíkinga. Það má því lesa úr þessu að tölfræðin sé alls ekki á bandi Keflavíkur fyrir kvöldið. En leikurinn hefur nú reyndar aldrei verið spilaður á pappír svo þegar út í alvöruna er komið skiptir það engu.

Prettyboitjokko spáir í spilin
Nú er komið að Patrik Atlasyni, sem flestir þekkja sem tónlistarmanninn prettyboitjokko eftir að samnefnt lag var gefið út fyrr á árinu að spá fyrir um úrslit fyrir okkur.

Víkingur - Keflavík 3 - 0

Það er HITIII á Luigi þessa dagana, enda að gefa út lagið HITIII Á KlÚBBUM 05.05. Og jú, hann er vissulega PBT, þannig 3-0.

Dómarar Jóhann Ingi Jónsson er dómari leiksins. Honum til aðstoðar eru þau Eðvarð Eðvarðsson og Rúna Kristín Stefánsdóttir. Elías Ingi Árnason er fjórði dómari og eftirlitsmaður KSÍ er Kristinn Jakobsson.

Víkingur
Víkingar hafa farið liða best af stað þetta sumarið og sitja í efsta sæti deildarinnar með fullt hús stiga eftir fjóra sigurleiki. Þeir eru jafnframt eina lið deildarinnar sem enn hefur ekki fengið á sig mark og er markatalan úr þessum fjórum leikjum 8-0.

Markaskorun liðsins hefur dreifst vel en sex leikmenn hafa skorað mörkin átta sem liðið hefur sett á andstæðinga sína til þessa og sumir myndu því jafnvel segja að Víkingar eigi ýmislegt inni sóknarlega. Síðast mætti liðið KA hér í Víkinni og hafði þar 1-0 sigur en sigurmark Víkingar gerði Gunnar Vatnhamar undir lok leiks.

Keflavík
Gestirnir úr Bítlabænum hafa heldur gefið eftir eftir sigur í fyrsta leik. Tvö töp á heimavelli gegn KR og ÍBV hafa fylgt í deildinni en í millitíðinni gerði liðið þó ágæta ferð norður á Akureyri og gerði þar markalaust jafntefli við KR.

Eitthvað hefur verið um hnjask í leikmannahópi Keflavíkur og hafa til að mynda fyrirliðinn Magnús Þór Magnússon og miðjumaðurinn reyndi Frans Elvarsson verið frá vegna meiðsla að undanförnu. Sigurður Ragnar Eyjólfsson þjálfari Keflavíkur átti þó von á að það færi að styttast í þá til baka og til að mynda væri Frans aðeins byrjaður að æfa fyrir síðasta leik liðsins gegn ÍBV þó hann hafi ekki verið orðinn leikfær þá.

Heimavöllur Hamingjunnar heilsar! Heil og sæl kæru lesendur og verið velkomin í þessa í beina textalýsingu Fótbolta.net frá Heimavelli hamingjunnar þar sem heimamenn í Víkingi taka á móti Keflavík í fimmtu umferð Bestu deildar karla í knattspyrnu.