Eiður Aron meiddist í upphitun Verulega slæmar fréttir fyrir ÍBV. Sást haltra til búningsklefa áðan.

Eigandi ÍBV fær kveðju Daníel Geir Moritz, eigandi ÍBV, er ekki staddur í Árbænum í dag. Hann er í VIPpinu á Emirates leikvangnum þar sem Arsenal er að rúlla yfir Wolves. Ætlaði að sjá bikar fara á loft en ekkert varð af því. Geri ráð fyrir því að hann fylgist grannt með í gegnum þessa textalýsingu.

Þórður Gunnar leikfær Það kemur einhverjum á óvart að sjá Þórð Gunnar Hafþórsson í byrjunarliði Fylkis. Hann virtist hafa tognað þegar hann tók sprettinn og lagði upp mark Péturs Bjarnasonar gegn Stjörnunni. En hann slapp við tognun, fékk krampa.

Spáð tæklingum Það má búast við baráttuleik í votveðrinu. Við fáum væntanlega einhverjar hressandi tæklingar. Pétur dómari vanur að leyfa mikið svo ég geri ráð fyrir stuði.

Tvær breytingar hjá Fylki Birkir Eyþórsson og Pétur Bjarnason koma inn í byrjunarlið Fylkis frá jafnteflinu gegn Stjörnunni. Elís Rafn Björnsson og Ólafur Karl Finsen eru meiddir og ekki í leikmannahópnum.

Þrjár breytingar á liði ÍBV Eiður Aron Sigurbjörnsson kemur inn eftir leikbann og Arnar Breki Gunnarsson og Sverrir Páll Hjaltason koma einnig inn. Oliver Heiðarsson og Guðjón Ernir Hrafnkelsson fara á bekkinn og Hermann Þór Ragnarsson er í banni eins og fram hefur komið.

Veðurguðirnar sjá um að vökva Sumarið heldur áfram að gefa. Sannkallað haustveður rétt áður en við skellum okkur í júnímánuð. Óþarfi að vökva völlinn því það hefur hellirignt í allan dag.

Fylkismenn ósigraðir í síðustu tveimur

Fylkir er með sjö stig, stigi meira en ÍBV. Liðið hefur safnað fjórum stigum í síðustu tveimur leikjum.

„Það var margt jákvætt í kvöld. Þetta er gaman og það er góður andi í liðinu. Það er erfitt að fara í gegnum okkur. Ef við erum þolinmóðir fara stigin að hrannast inn," sagði Rúnar Páll Sigmundsson, þjálfari Fylkis, eftir 2-2 jafntefli gegn Stjörnunni í síðasta leik.

Fylkir 53% - ÍBV 38% Frá aldamótum hafa þessi lið mæst 34 sinnum í efstu deild. Árbæjarliðið hefur 18 sinnum unnið og ÍBV 13 sinnum. Þrívegis hafa liðin gert jafntefli.


Úr leik Fylkis og ÍBV 2014.

Eyjamenn hafa tapað fjórum leikjum í röð
Hermann þjálfaði Fylki 2015-2016.

ÍBV er í fallsæti en liðið hefur tapað fjórum síðustu leikjum. Í síðustu umferð tapaði liðið 2-3 fyrir FH en Hermann Hreiðarsson þjálfari ÍBV lét dómarann heyra það eftir leik. Hermann hefur vægast sagt verið ósáttur við dómgæsluna á þessu tímabili.

Hermann Þór Ragnarsson tekur út leikbann í dag eftir að hafa fengið rautt gegn FH. Eyjamenn endurheimta hinsvegar fyrirliða sinn, Eið Aron Sigurbjörnsson, en hann snýr aftur eftir leikbann.

Máni Austmann spáir i leikinn Fylkir 2 - 2 ÍBV
Þetta verður virkilega skemmtilegur leikur fyrir varnarmenn þar sem að Rúnar stillir í 4-4-2 með Óla Kalla og Pétur Bjarna fremsta. Hermann Hreiðars ákveður að spegla þegar hann fær skýrsluna í hendurnar og hendir Oliver uppá topp með Halldóri. Mér þykir líklegt að það verði smá hasar á bekknum. Báðir þjálfarar hreyta smá í dómarann að leik loknum. Leikurinn endar 2-2.


Máni í leik með FH í fyrra. Hann leikur nú fyrir Fjölni í Grafarvogi.

Til hamingju Fylkir!

Í dag er afmælisdagur Fylkis. Afmælisdagskrá er fyrir leikinn þar sem eitthvað er í boði fyrir alla aldurshópa.

Lögregluvarðstjórinn er í Árbænum

Dómari: Pétur Guðmundsson
Aðstoðardómarar: Bryngeir Valdimarsson og Eysteinn Hrafnkelsson
Fjórði dómari: Helgi Mikael Jónasson

Hvítasunnudagur Hvítasunnudagur er 49. dagurinn eftir páskadag og tíundi dagurinn eftir uppstigningardag. Dagsins er minnst sem þess dags þegar heilagur andi kom yfir lærisveinana og aðra fylgjendur Jesú eins og lýst er í Postulasögunni.

Í dag klukkan 17 hefst afar mikilvægur leikur Fylkis og ÍBV í 9. umferð Bestu deildarinnar.