Byrjunarliðin Heimir Guðjónsson þjálfari FH gerir 2 breytingar á sínu liði en það eru Jóhann Ægir Arnarsson og Vuk Oskar Dimitrijevic sem koma inn í byrjunarliðið. Grétar Snær Gunnarsson meiddist í síðasta leik og er því ekki með, á meðan Úlfur Ágúst Björnsson sem var í byrjunarliðinu í síðasta leik er farinn til Bandaríkjanna í nám.

Arnar Gunnlaugsson þjálfari Víkinga gerir 3 breytingar á sínu liði sem sigraði Egnatia í Albaníu síðasta fimmtudag. Það eru Jón Guðni Fjóluson og Valdimar Þór Ingimundarson sem fá sér sæti á bekknum en Pablo Punyed meiddist í þeim leik. Inn fyrir þá koma Helgi Guðjónsson, Danijel Dejan Djuric og Davíð Örn Atlason.

Spámaðurinn Það er Birkir Karl Sigurðsson, annar af þáttarstjórnendum Chess After Dark hlaðvarpsins, sem spáir í leiki umferðarinnar.

FH 1 - 2 Víkingur
Þetta verður mikill baráttuleikur. Heimir Guðjóns er ennþá brjálaður eftir tapið gegn Hödda Magg í Einvígi Aldarinnar en hann verður því miður aftur mátaður í þessu einvígi af Arnari Gunnlaugs. Víkingar eru of góðir og landa hér sigri.

Spilað á frídegi verslunarmanna Það er spilað á þessum frídegi verslunarmanna vegna þess að Víkingar unnu sitt einvígi gegn Egnatia í forkeppni Sambandsdeildarinnar síðasta fimmtudag. Þeir munu því spila í 3. umferðinni í þeirri keppni aftur næsta fimmtudag gegn Flora Tallin frá Eistlandi. Áhugavert verður að sjá uppstillingu Víkinga í kvöld, hvort þeir muni hlífa lykil mönnum fyrir komandi Evrópu leik.

Dómarar leiksins Sigurður Hjörtur Þrastarson verður maðurinn með flautuna í kvöld en honum til aðstoðar verða Bryngeir Valdimarsson og Eysteinn Hrafnkelsson.

Eftirlitsmaður KSÍ er Frosti Viðar Gunnarsson og varadómari er Arnar Þór Stefánsson.

EuroVikes búnir að rétta af skútuna Velgengi Víkinga síðustu ár hafa verið þannig að það var byrjað að tala um verstu katastrófu þegar þeir höfðu ekki unnið leik, 4 leiki í röð. Í þessum 4 leikjum voru 3 evrópuleikir og einn leikur í deild. Nú er hinsvegar bjartara yfir Víkingum þar sem þeir eru búnir að vinna 2 sterka sigra í röð. Fyrst snýttu þeir HK 5-1 í deildinni, svo fóru þeir út til Albaníu og snúðu einvíginu við gegn Egnatia. Þeir unnu 2-0 úti eftir að hafa tapað 1-0 heima.

Víkingar hafa dreift markaskorun frekar vel á hópinn. Það er nefnilega Helgi Guðjónsson sem er markahæstur með 7 mörk en hann byrjar oft á bekknum. Næstur þar á eftir en Danijel Dejan Djuric með 6 mörk.

Heitasta lið landsins? FH hefur ekki tapað í 6 leikjum í röð núna. Í síðustu umferð fóru þeir á Vestfirði þar sem þeir unnu Vestra 2-0. Fyrir það voru þeir með 5 heimaleiki í röð á Kaplakrikavelli. Þessi velgengni hefur skilað Hafnfirðingum upp í 4. sætið þar sem þeir eru jafnir Val á stigum, sem er í 3. sæti, og eru aðeins 8 stigum á eftir Víkingum í 1. sæti.

Siguðrur Bjartur Hallsson er markahæsti leikmaður liðsins með 6 mörk en næst markahæstur er Úlfur Ágúst Björnsson með 5 mörk. Úlfur er hinsvegar farinn frá félaginu þar sem hann er farinn til Bandaríkjanna að stunda nám.

17. umferð Bestu deildar karla Komið þið sæl og blessuð og verið velkomin í beina textalýsingu frá leik FH og Víkings í 17. umferð Bestu deild karla.

Leikurinn hefst klukkan 19:15 og verður spilaður á Kaplakrikavelli.