Byrjunarliðin Darko Bulatovic, Andri Fannar Stefánsson og Jakob Snær Árnason koma inn í lið KA. Kári Gautason, Harley Willard og Dagur Ingi Valsson, sem tekur út leikbann, detta út úr liðinu.

Birgir Steinn Styrmisson og Alex Þór Hauksson koma inn í liðið fyrir Gyrði Hrafn Guðbrandsson og Finn Tómas Pálmason sem tekur út leikbann.

Benoný Breki sjóðandi heitur Benoný Breki Andrésson, framherji KR, er sjóðandi heitur en þessi 19 ára gamli leikmaður hefur skorað 15 mörk í deildinni í sumar. Hann gerði sér lítið fyrir og skoraði fernu í 7-1 sigri á Fram í síðustu umferð.

Spáir fjörugum leik Hilmar Jökull, stuðningsmaður Breiðabliks og formaður Tólfunnar, spáir fjörugum leik.

KA 3 - 3 KR
Bæði lið unnu síðustu leiki. KR slátraði Fram 7-1 í Vesturbænum á meðan að Akureyringar gerðu góða ferð í lautina. 3-3 stemnings leikur, VÖK með þrennu og KR aftur í fallbaráttu

Dómarateymið Jóhann Ingi Jónsson verður með flautuna hér í dag. Kristján Már Ólafs og Þórður Arnar Árnason verða honum til aðstoðar. Birgir Þór Þrastarson er varadómari og Þóroddur Hjaltalín eftirlitsmaður KSÍ.

Fyrri viðureignir Báðir leikir liðanna í sumar enduðu með jafntefli. Fyrri leikurinn fór fram hér á Akureyri þar sem uppaldi Þórsarinn, Atli Sigurjónsson, kom KR yfir snemma leiks en Ásgeir Sigurgeirsson jafnaði metin í seinni hálfleik. Guy Smit fékk að líta rauða spjaldið stuttu áður. Seinni leikurinn fyrir sunnan var dramatískur en Finnur Tómas Pálmason jafnaði metin í 2-2 fyrir KR á lokasekúndum leiksins.

KR Tímabil KR hefur verið mikil vonbrigði en liðið er væntanlega fullt sjálfstrausts eftir síðasta leik þar sem liðið valtaði yfir Fram 7-1 en liðið gerði 2-2 jafntefli gegn Vestra á Ísafirði í fyrstu umferð eftir tvískiptingu.

KA Tímabil KA hefur verið upp og niður vægast sagt. Byrjaði afar illa en hefur farið vel upp á við og liðið stóð uppi sem bikarmeistari. Eftir bikarúrslitin gerði liðið 3-3 jafntefli gegn HK en fylgdi því eftir með 3-1 sigri á Fylki um síðustu helgi.

Góðan daginn Verið velkomin í beina textalýsingu frá leik KA og KR í neðri hlutanum í Bestu deildinni. Leikurinn fer fram á Greifavellinum og hefst klukkan 14.