Góðan og blessaðan sumardag. Héðan frá Hlíðarenda verður bein textalýsing á leik Vals og Keflavíkur sem hefst, að öllum líkindum, stundvíslega kl 19.15. Geir Ólafsson er mættur á Lollastúkuna á Hlíðarenda og bíður spenntur.

Athygli vekur að í byrjunarliði Vals eru hvorki Halldór Kristinn Halldórsson né Guðjón Pétur Lýðsson. Í þeirra stað koma Brynjar Kristmundsson og Kolbeinn Kárason. Í liði Keflvíkinga snýr Hilmar Geir Eiðsson aftur í byrjunarlið þeirra en Jóhann Ragnar Benediktsson tekur út leikbann.

Fyrir leikinn í dag eru Valsmenn í 9. sæti Pepsi deildarinnar með 6 stig en Keflvíkingar eru í því 5. með 7 stig. Það er því skammt stórra högga á milli og leikurinn mikilvægur báðum liðum.

Þá er leikurinn hafinn! Valsmenn sækja í átt að að Landspítalanum en Keflvíkingar í átt að Keiluhöllinni.

Við biðjumst velvirðingar á tæknilegum örðuleikum með nettengingu héðan af Hlíðarenda. Í millitíðinni hefur lítið gerst í leiknum. Keflvíkingar hafa átt eitt færi og Valsmenn tvö hálffæri.

Keflvíkingar eru sterkari aðilinn þessa stundina og eiga hér hornspyrnu eftir fína sókn sem fór kantanna á milli. Úr hornspyrnunni átti Guðmundur Steinarsson fínan skalla en boltinn fór framhjá.

Guðmundur Steinarsson leikur listir sínar og tók hér boltann niður á liðsfélaga sinn með öxlinni eftir útspark. Steinarsson samur við sig.

Matthías Guðmundsson átti laglegan sprett upp í gegnum vörn Keflvíkinga og gaf fínan bolta fyrir markið en þar var enginn nema Keflavíkurvörnin. Boltinn barst að lokum til Úlfars Hrafns sem átti misheppnað skot fyrir fætur Kolbeins Kárasonar sem kláraði færið illa og boltinn framhjá. Þetta er allt að lifna við.

Frans Elvarsson í fínu færi. Fékk boltann inni í vítateig og sneri af sér tvo Valsmenn en Haukur Páll náði að pota í boltann og koma í veg fyrir skot. Vel gert hjá Frans.

Enn eiga Keflvíkingar fína sókn. Boltinn barst upp hægri kantinn og fyrir markið en skalli Jóhanns Birnis var yfir markið.

Það er kominn hálfleikur hér á Hlíðarenda. Bæði lið hafa átt ágætis sóknir en Keflvíkingar virkað sprækari. Leikurinn hefur heilt á litið verið fremur rólegur og daufur.

Þessi seinni hálfleikur byrjar þveröfugt við hvernig sá fyrri endaði. Eitthvað hefur Kristján Guðmundsson hrist upp í sínum mönnum því þeir virka mun grimmari og ákveðnari þessar fyrstu mínútur.

Þar skall hurð nærri Keflavíkurhælum. Haraldur Freyr var heillum horfinn og Kolbeinn Kárason hirti af honum boltann og komst einn gegn Ómari en setti boltann rétt framhjá. Kolbeinn hefur komið sterkur inn í Valsliðið og átt fína spretti.

Haraldur Freyr með fínan skalla sem Sindri Snær varði vel í horn.

Kristinn Freyr, nýkominn inn á, átti hér hörkufínt skot úr miðjum teignum en rétt framhjá.

Valsmenn eiga hér aukaspyrnu á hættulegum stað eftir flottan sprett Kristins Freys.

Rúnar Már tók spyrnuna, hún var föst en beint í fangið á Ómari sem greip boltann.

Aftur nær Haraldur Freyr að skalla boltann að marki eftir hornspyrnu en Sindri Snær og varnarmenn Vals náðu að koma boltanum frá.

Kolbeinn Kárason er hvergi nærri hættur. Hann fékk boltann á miðjunni og spólaði sig í gegnum vörn Keflvíkinga en Einar Orri náði að komast fyrir skot Kolbeins.

Rúnar Már tætti hér fram völlinn og framhjá Grétari Atla sem togaði Rúnar niður. Aukaspyrna dæmd alveg við vítateigslínuna. Brynjar Kristmundsson tók spyrnuna og skrúfaði boltann rétt yfir mark Keflvíkinga.

Matthías Guðmundsson var hér kominn aleinn á móti Ómari en virtist hafa of langan tíma til að athafna sig og setti boltann hátt og langt framhjá. Illa farið með úrvals færi.

Leiknum er lokið með sannfærandi sigri Valsmanna. Umfjöllun og viðtöl koma hér inn bráðlega. Takk fyrir að fylgjast með!