Sæl og velkomin í beina textalýsingu frá Selfossvelli. Eftir klukkutíma flautar Þóroddur Hjlatalín jr dómari til leiks Selfoss og Breiðabliks. Hér á Selfossi er fínasta veður og um að gera fyrir þá sem hafa tök á því að renna bara á völlinn. Fyrir hina verð ég hér með lýsingu á því helsta sem gerist. Byrjunarliðin ættu að fara detta inn hvað á hverju.

Sigmar verður ekki í kastljósinu í kvöld í liði Blika en Invar Kale kemur í markið í fyrsta skipti í sumar. Akureyringurinn Gísli Páll einnig inn í liðið á ný ásamt Hauki Baldvins, Olgeiri Sigurjóns og Petar Rnkovic. M.o.ö. fimm breytingar á liðinu sem tapaði 0-2 gegn Fram í síðustu umferð.

Logi Ólafsson er hinsvegar öllu minna róttækur og stillir upp nákvæmlega sama byrjunarliði og í síðustu tveimur leikjum og meira að segja sama bekk líka. Ekkert pláss í byrjunarliði m.a. fyrir Ingó þrátt fyrir að kappinn eigi afmæli í dag.

Það var öllu meira undir síðast þegar þessi lið mættust í deildarleik. Breiðablik fór langleiðina með að tryggja sér titilinn á meðan tap þýddi að Selfoss féll endanlega. Leikurinn endaði 3-0 fyrir Breiðablik.

Fyrir þá sem vilja hlusta á töluvert hlutdræga lýsingu af þessum leik er hægt að hlusta á Rakarann Kjartan Björnsson lýsa þessum leik á Suðurland FM en hann er að koma sér fyrir í brekkunni. Slóðin er www.963.is Ég ætla að skjóta á það strax að Viðar Örn Kjartansson verði maður leiksins á þeim fjölmiðli.

Endilega notið hashtagið #fotbolti á Twitter þegar þið tjáið ykkur um leikinn. Skondin og skemmtileg tíst rata jafnvel inn í textalýsinguna.

Allt að verða klárt á Selfossi og liðin ganga inn á völlinn

Heimamenn byrja með boltann og sækja í átt að frjálsíþróttavellinum með smá golu í fangið.

Blikar eru öllu sprækari til að byrja með en þetta er lítið annað en klafs og barátta hér í byrjun og mest lítið að gerast.

Flottur sprettur hjá Viðari Kjartans sem var nálægt því að spóla sig í gegnum vörn Blika en þeir náðu að hreinsa í horn. Ekkert varð úr þeirri spyrnu.

Robert Sandnes í ágætu færi eftir ágætis undirbúning en Ingvar Kale átti ekki í vandræðum með að hirða boltann af honum. Olgerir Sig átti gott skot hárfínt framhjá í kjölfarið hinumegin á vellinum. Blikar eru áfram öllu sterkari en heimamenn hafa átt öllu skárri færi.

Royrane komst einn í gegn eftir góðan undirbúning hjá Andra Frey og Viðari Kjartans en Sverrir Ingi varnarmaður Blika komst fyrir skotið á síðustu stundu og bjargaði í horn. Besta færi leiksins og Selfyssingar heldur að hressast.

Robert Sandnes komst í gott skotfæri fyrir utan vítateig eftir góðan samleik heimamanna en skot hans var slappt og fór framhjá markinu.

Jón Daði var rétt búinn að endurtaka leikinn frá því í síðustu umferð er hann setti aukaspyrnu í netið en Ingvar Kale varði vel í markinu hjá Blikum.

Hálfleikur á Selfossi. Breiðablik með forystu og hafa verið örlítið sterkari og mæta greinilega vel einbeittir til leiks. Selfyssingar hafa á móti átt nokkur ágæt færi en vörnin hefur ekki verið sannfærandi og enn leka föst leikatriði í netið hjá þeim.

Seinni hálfleikur er hafin á ný og bæði lið mæta óbreytt til leiks.

Royrane með ágætt skot fyrir utan teig sem lak framhjá markinu. Selfoss er aðeins undan vindi í seinni hálfleik.

Andri Rafn liggur eftir á vellinum en virðist nú ekki mikið þjáður.

Ingvar Kale missti boltann í úthlaupi og virtist brjóta á Babacar Sarr sem liggur eftir í teignum. Selfyssingar heimta víti og eru brjálaðir út í Þórodd Hjaltalín dómara.

Blikar virðast vera að landa þessu hér á Selfossi. heimamenn hafa verið sterkari í seinni hálfleik en brotthvarf Babacar og seinna mark Blika virðist hafa slegið ákefðina úr þessu hjá heimamönnum.

Fáránlegt að Blikar hafi ekki bætt þriðja markinu við, Sindri Snær átti lúmskt skot sem Ismet varði vel en boltinn barst til Kristins Jónssonar sem skaut í stöngina úr dauðafæri. Vörn heimamanna steinsofandi.

Leik lokið á Selfossi. Viðtöl og umfjöllun koma inn seinna í kvöld.