SKÝRSLAN: Seiglusigur Blika á Akureyri
Hvað réði úrslitum?
Thomas Mikkelsen skoraði úr vítaspyrnu á 3. mínútu leiksins. Það reyndist eina mark leiksins. Það var enginn alveg viss um hvað Ívar dæmdi á, svo að Hörður Magnússon og félagar í Pepsi Max mörkunum verða að sýna ringluðum knattspyrnuáhugamönnum hvað málið snerist um.
Bestu leikmenn
1. Damir Muminovic
Sá vann fyrir kaupinu í dag. Þetta var frammistaða af gamla skólanum hjá miðverðinum, hann henti sér fyrir skot og hreinsaði hvern boltann af fætur öðrum. Stýrði vörninni frábærlega.
2. Almarr Ormarsson
Tapaði varla návígi á miðjunni og undirritaður er nokkuð viss um að hann sé með segul í takkaskónum, því að hann tekur hvern einasta seinni bolta. Dreif sína menn áfram og var öruggur í sínum aðgerðum.
Atvikið
Vítaspyrnudómurinn. Hann réði úrslitum og fékk menn aldeilis til þess að klóra sér í hausnum. Það var erfitt að sjá hvað gerðist nákvæmlega, en kannski var þetta bara hárréttur dómur hjá Ívari.
Hvað þýða úrslitin?
Blikar eru jafnir Skagamönnum á toppi deildarinnar með 10 stig, en þessi lið mætast einmitt í uppgjöri toppliðanna í næstu umferð. KA menn hafa spilað ágætlega í fyrstu 4 umferðunum, en uppskeran hefur ekki verið sem skyldi og hafa þeir einungis 3 stig í 7. sætinu.
Vondur dagur
Sóknarþenkjandi leikmenn beggja liða hafa átt betri daga. Gekk ekki nógu vel að skapa opin færi í leiknum og var oft fátt um fína drætti í þeim efnum. Thomas Mikkelsen hafði úr mjög litlu að moða og komust félagar hans Höskuldur Gunnlaugsson og Kolbeinn Þórðarson ekki í mikinn takt við leikinn. Þeir gátu þó fagnað í leikslok.
Dómarinn - 6
Komst nokkuð vel frá sínu almennt. Vítaspyrnudómurinn umtalaði gæti hækkað hann eða lækkað í einkunn.