SKÝRSLAN: KR með 4 stiga forskot á toppi deildarinnar
Hvað réði úrslitum?
Fyrsta markið hjá Kidda Jóns. Fyrsta markið kom KR á bragðið þar sem Kiddi tók varnarmenn Blika í bakaríið og smurði boltann svo út í bláhornið.
Bestu leikmenn
1. Kristinn Jónsson
Kiddi naut sín í botns á móti fyrrum félögum sínum. Skoraði glæsilegt mark og var öflugur í vörn og sókn. Lang bestur í kvöld.
2. Óskar Örn Hauksson
Óskar var eins og oft áður með bestu mönnum vallarins. Fór oft á tíðum illa með varnarmenn Blika og þeir þurftu að sparka hann niður trekk í trekk sem endaði með að hann þurfti að koma af velli.
Atvikið
Annað mark KR.
Gummi Bö með skelfilega sendingu beint á Óskar, Óskar hleður í skotið beint á Hlyn sem missir boltann inn, rosalega dýrt og klaufalegt hjá Blikum.
Hvað þýða úrslitin?
KR eru nú með 26 stig á toppi deildarinnar, 4 stigum meira en Blikar sem eru í 2.sætinu. Mótið hálfnað og KR í vænlegri stöðu.
Vondur dagur
Hlynur Örn Hlöðversson.
Hlynur Örn fékk sénsinn í dag þegar Gulli fór meiddur af velli. Hlynur gerði skelfileg mistök í 2.marki KR þegar hann missti boltann í gegnum lúkurnar á sér og í markið.
Dómarinn - 4
Ívar Orri hleypti leiknum upp í vitleysu oft á köflum, sleppti augljósum spjöldum og aukaspyrnum. Lélegur í dag fyrir bæði lið.