SKÝRSLAN: Fallfnykur af bitlausum Grindvíkingum
Hvað réði úrslitum?
Hrikalega mikilvægur leikur fyrir bæði lið en það voru Fylkismenn sem voru gíraðri í byrjun og Grindvíkingar komust ekki upp brekkuna sem til varð. Sóknaraðgerðir gestaliðsins voru gríðarlega máttlausar allan leikinn.
Bestu leikmenn
1. Ólafur Ingi Skúlason - Fylkir
Fyrirliði Fylkis fór fyrir sínum mönnum og sýndi góða stjórn þar sem hann lék í þriggja manna hafsentalínu liðsins.
2. Geoffrey Castillion - Fylkir
Skoraði, átti stóran þátt í öðru marki og krækti í gult spjald. Allt eftir uppskrift!
Atvikið
Josip Zeba braut á Ragnari Braga Sveinssyni í upphafi leiks og vítaspyrna dæmd. Áætlanir Grindvíkinga fóru strax í vaskinn.
Hvað þýða úrslitin?
Fylkismenn þurftu að vinna til að spyrna sér frá fallbaráttu og það tókst. Enginn glæsibragur á spilamennsku liðsins en stigin þrjú eru allt það sem máli skiptir.
Vondur dagur
Sóknarleikur Grindvíkinga er bitlaus smjörhnífur eins og sést á því að liðið hefur skorað þrettán mörk í sumar. Enn verri fréttir fyrir Grindavík að nú eru auk þess brotalamir í varnarleiknum að koma upp. Það hljómar eins og örugg uppskrift að falli.
Dómarinn - 9
Helgi Mikael og hans teymi skiluðu inn frábærri frammistöðu í kvöld. Vítaspyrnudómurinn réttur eins og nær allar aðrar ákvarðanir.