SKÝRSLAN: Von Grindavík lifir - Skaginn áfram í Pepsi-Max
Hvað réði úrslitum?
Það var ekki mikið um færi í þessum leik og liðuin nýttu illa góðar stöður til að búa til góð færi. Skagamenn skoruðu geggjað mark úr aukaspyrnu og Grindavík úr einu af óteljandi föstum leikatriðum í leiknum.
Bestu leikmenn
1. Josib Zeba(Grindavík)
Zeba var eins og klettur vörn Grindavíkur og skoraði markið sem heldur vonum þeirra á lífi.
2. Stefán Teitur Þórðarson(ÍA)
Stefán Teitur var besti maður ÍA í þessum leik. Var góður á miðjunni og skoraði þetta líka geggjaða mark.
Atvikið
Klárlega markið sem Stefán Teitur skoraði. Aukaspyrna rétt utan teigs sem Stefán smellti bara í vinkilinn. Geggjað mark!
Hvað þýða úrslitin?
Skagamenn eru formlega öruggir með sitt sæti í deild þeirra bestu á næsta ári. Grindavík á ennþá tölfræðilegan möguleika á að bjarga sér en það þarf eitthvað það ótrúlegasta kraftaverk sem sést hefur í íslenskri knattspyrnu til að það gangi upp.
Vondur dagur
Skagaliðið í heild sinni í seinni hálfleik. Voru alveg rosalega slakir og í raun eftir á í öllum aðgerðum. Voru bara heppnir að Grindavík nýtti sér það ekki betur. Þeir fengu 2-3 sjensa til að búa til alvöru færi en fóru afar illa að ráði sínu.
Dómarinn - 7
Fínasta frammistaða hjá Helga Mikael og félögum. Engin stór ákvörðun sem klikkaði. Ekki erfiður leikur að dæma.