SKÝRSLAN: Vögguvísa kveðin í Kórnum
Hvað réði úrslitum?
Víkingar komust yfir uppúr bókstaflega engu þegar aukaspyrnu utan af kanti var sparkað inn á teiginn og Sigurður Hrannar hleypti honum inn, dýr mistök sem settu heimamenn í erfiða stöðu eftir að hafa verið örlítið hættulegri framan af.
Bestu leikmenn
1. Viktor Örlygur Andrason (Víkingur)
Viktor fær þetta fyrir solid leik, skoraði markið sem kom Víkingum yfir án þess að hafa fengið færi og leysti svo hafsentinn með prýði eftir að Halli meiðist.
2. Kári Árnason (Víkingur)
Skallaði ég veit ekki hvað marga bolta frá, átti teiginn frá A til Ö og var hrikalega solid í vörninni. Verð að nefna Ágúst Hlyns hér líka sem var hvað sprækastur Víkinga sóknarlega en hvarf þó á köflum.
Atvikið
HK-ingar vildu fá hendi á Nikolaj sýndist mér þegar Gummi hreinsaði í hann og boltinn hrökk til Óttars sem skoraði annað markið og endanlega drap steindauðan leik fyrir.
Hvað þýða úrslitin?
Víkingar sækja sinn annan sigur og fara upp í 6. sæti með 8 stig, HK haggast ekki með sín 5 stig.
Vondur dagur
Sigurður Hrannar Björnsson veit upp á sig sökina fyrir fyrsta markið, fyrir utan það átti hann flottan leik en það er vont að gefa andstæðingnum forystuna.
Dómarinn - 4
Siggi var í vandræðum í þessum leik, flautandi stundum og stundum ekki á keimlík brot, dæmdi ekki augljósa aukaspyrnu sem kostaði Arnar gult spjald og tókst að fá bæði lið algjörlega upp á móti sér sem olli svolitlum hita og æsing sem er aldrei jákvætt fyrir dómarann. Þessi hiti og æsingur hinsvegar bjargaði mér frá því að dotta yfir leiknum og þakka ég Sigga fyrir það.