SKÝRSLAN: Vikes í toppmálum en þungskýjað hjá FH
Hvað réði úrslitum?
Það tók smá tíma fyrir Víkinga að trekkja sig í gang en á endanum vannst verðskuldaður sigur. Liðið var gríðarlega þétt og gaf fá færi á sér. Öflug liðsheild sem skilaði þessum sigri en leikgleðina virðist vanta hjá FH-ingum.
Bestu leikmenn
1. Nikolaj Hansen - Víkingur
Orðinn markahæstur í deildinni. Skoraði bæði mörkin í dag og reyndi svo við þrennuna með hjólhestaspyrnu! Segir sitt um sjálfstraustið í þeim danska!
2. Kári Árnason - Víkingur
Þórður átti enn einn góða leikinn í markinu, Júlíus var öflugur á miðjunni og Adam Páls átti flotta innkomu. En Kári tekur annað sætið.
Atvikið
FH skapaði sér ekki mörg færi en Matthías Vilhjálmsson fékk algjört dauðafæri þegar staðan var markalaus. Skylduskorunarfæri sem fór forgörðum hjá Matta.
Hvað þýða úrslitin?
Víkingar eru komnir á toppinn fyrst Valur tapaði í Garðabæ. FH-ingar töpuðu sínum þriðja leik í röð og eru átta stigum á eftir. Hafnfirðingar þurfa nauðsynlega að fara að skila sigrum í hús svo raddir um breytingar í Kaplakrika verði ekki háværari. Staða Loga Ólafssonar verður rædd á kaffistofum.
Vondur dagur
Steven Lennon náði ekki að vera skugginn af sjálfum sér. Sjaldan sem maður sér hann svona dapran. Í varnarleiknum voru FH-ingar klaufalegir og svifaseinir, ákvarðanirnar í sóknarleiknum flestar vondar. Vondur dagur heilt yfir fyrir FH.
Dómarinn - 8
Flottur leikur hjá þriðja liðinu. Einar og hans menn gerðu flest rétt.