SKÝRSLAN: Þróttur fer yfir á Laugardalsvöll og spilar í úrslitaleiknum!
Hvað réði úrslitum?
Þróttarar héldu alltaf einbeitingu og vörðust vel. FH-ingar fengu svo sannarlega tækifæri til að jafna leikinn en Þróttarar gerðu sitt vel og svo breytti innkoma Dani Rhodes miklu. FH byrjaði seinni hálfleikinn vel en svo setti Þróttur í næsta gír, og næsta gír, og gekk frá leiknum.
Bestu leikmenn
1. Ólöf Sigríður Kristinsdóttir (Þróttur R.)
Var stórkostleg í dag. Átti stóran þátt í fyrsta marki, risastóran þátt í þriðja markinu og skoraði svo það fjórða sjálf. Hefði átt að skora meira samt.
2. Dani Rhodes (Þróttur R.)
Þvílík innkoma hjá henni. Gríðarlega snögg og mikill kraftur í henni. Algjörlega frábær og mun hjálpa Þrótturum á seinni hluta tímabilsins. Miðverðir Þróttar, Sóley og Jelena, fá líka mikið hrós fyrir framistöðu sína. Frábærar í dag.
Atvikið
Þegar Dani Rhodes var sett inn á. Gjörbreytti leiknum og það hjálpaði Þrótturum heldur betur að landa sigrinum.
Hvað þýða úrslitin?
Þróttur fer í bikarúrslit í fyrsta sinn í sögunni! FH situr eftir, en liðið heldur áfram í baráttunni um að komast upp í Pepsi Max-deildina á nýjan leik.
Vondur dagur
Rannveig Bjarnadóttir reimaði ekki alveg á sig markaskóna. Fékk dauðafæri til að jafna í 1-1 í fyrri hálfleiknum en brást bogalistinn. Ef hún hefði verið á deginum sínum, þá hefði hún getað skorað þrennu.
Dómarinn - 10
Með allt á hreinu! Gífurlega vel dæmdur leikur.