SKÝRSLAN: Blikar náðu fram hefndum gegn ÍBV
Hvað réði úrslitum?
Blikar eru bara með betra lið, ekkert flóknara en það. Stjórnuðu leiknum frá a-ö, fengu haug af hornspyrnum og skoruðu 7 mörk. ÍBV ógnaði lítið en náði samt að skora tvö mörk.
Bestu leikmenn
1. Heiðdís Lillýardóttir
Verð að velja hana mann leiksins. Átti mjög góðan leik, skoraði tvö mörk og var alltaf hættuleg í hornspyrnum Blika. Örugg varnarlega líka.
2. Agla María Albertsdóttir
Agla var frábær í dag þrátt fyrir að komast ekki á blað. Hún átti fjórar stoðsendingar og ógnaði stöðugt og bjó til endalaus færi fyrir Blika. Hefði mátt nýta sín færi þó en það þurfti svosem ekki í markaflóðinu í dag.
Atvikið
Fyrsta mark leiksins. Þetta var eiginlega aldrei spurning eftir það. Heiðdís kom Blikum yfir eftir aðeins 5. mínútna leik þegar hún fylgdi eftir skoti Kristínar.
Hvað þýða úrslitin?
Breiðablik fer upp í efsta sæti deildarinnar, a.m.k. tímabundið en Valur á leik til góða. ÍBV er áfram í 5. sætinu.
Vondur dagur
Mér finnst ekki beint ástæða til að henda einhverjum undir rútuna hér.
Dómarinn - 7
Allt í lagi bara. Held að vítið hafi verið rétt en er ekki búin að sjá það aftur. Nokkrar furðulegar ákvarðanir hér og þar en ekkert sem hafði úrslitaáhrif á leikinn.