SKÝRSLAN: Ísland og Noregur er ekki góð blanda í Evrópukeppnum
Hvað réði úrslitum?
Valur átti góðan hálftíma eða svo, þar sem jafnræði var með liðunum. Svo sýndi Bodo/Glimt af hverju þeir eru norskir meistarar og keyrðu bara yfir Valsmenn.
Bestu leikmenn
1. Ulrik Saltnes (Bodo/Glimt)
Stórkostlegur á miðsvæðinu. Skoraði eitt, fiskaði víti og lagði upp það þriðja. Frammistaða sem er ekki hægt að kvarta yfir.
2. Patrick Berg (Bodo/Glimt)
Leikmaður sem ég sé fyrir mér í stærra félagi. Skoraði tvö og stjórnaði ferðinni á miðsvæðinu.
Atvikið
Vítaspyrnan í seinni hálfleiknum. Gestirnir skoruðu úr henni og bættu svo fljótlega við þriðja markinu. Það fór langt með að ganga frá þessu einvígi. Staðan sem Guðmundur Andri komst í snemma leiks var líka frekar stórt atvik.
Hvað þýða úrslitin?
Valur er í skelfilegum málum fyrir seinni leikinn, rétt eins og FH sem tapaði 2-0 fyrir Rosenborg á heimavelli. Íslands og Noregur er ekki blanda sem virkar í Evrópukeppni. Alla vega ekki fyrir íslensku félagsliðin.
Vondur dagur
Skrái þetta á Patrick Pedersen. Fann sig engan veginn í dag sem fremsti maður Vals. Hefði reyndar líka verið hægt að henda ansi mörgum úr Valsliðinu í þennan flokk í dag... Christian Köhler og Johannes Vall fannst mér mjög daprir til dæmis.
Dómarinn - 5,5
Ekkert stórt atvik sem hann var með vitlaust. Fannst hann oft á tíðum flauta of mikið sem hindraði flæðið svolítið í leiknum. Vítaspyrnudómurinn var hárréttur hjá honum.