Það var og! Sigurður Marinó neglir í vegginn og Gunnar flautar til leiksloka. Flottur sigur Þórs á Gróttuliði sem brotnaði í fyrri hálfleik og átti full erfiða fjallgöngu framundan.

Ásgeir Marinó gerði svo endanlega út um vonir Seltirninga á 55. mínútu. Gróttumenn gerðu vel í að laga stöðuna en sigurinn var sanngjarn.

Sölvi vinnur aukaspyrnu á flottum stað fyrir Þórs. Spái því að Gunnar flauti til leiksloka að henni lokinni.

Gróttumenn reyna hvað þeir geta en þessi sigur er merktur heimamönnum, í sólinni á Akureyri.

Kjartan Kári með hörku skot af talsvert löngu færi! Daði virtist þó allan tímann vera með þennan.

Gróttumenn reyna hvað þeir geta að skapa sér örlitla vonarglætu en Þórsarar verjast vel og eru að sigla þessum sigri í Hamar.

12 mínútur eftir af venjulegum leiktíma. Það þarf Disney kraftaverk til þess að Grótta nái einhverju út úr þessum leik.

Jóhanni mistekst að finna Sölva fyrir opnu marki eftir slaka sendingu Kára Daníels til baka á markmann. Þetta hefði endanlega klárað leikinn!

Gunnar tekur Vigni Snæ og Pétur Theódór á tal þar sem að þeir áttu í einhverjum bjánalegum barningi þegar boltinn var víðsfjarri. Áfram með leikinn drengir.

Gróttumenn vilja hendi en Gunnar segir hornspyrna! Þar grípur Daði Freyr hornspyrnu Kristófers Orra.

Kjartan Kári gerir gríðarlega vel í að vinna aukaspyrnu á stórhættulegum stað fyrir Gróttu. Tékkaði inn á hægri svona 10 sinnum áður en að Vignir tók hann niður.

Gróttumenn hafa átt í stökustu vandræðum þegar að Þórsarar pressa þá hátt á vellinum. Það hefur búið til öll heimsins vandamál fyrir gestina.

Sigurður Marinó á glæsilega skiptingu út á hægri kantinn þar sem að Ásgeir Marinó er með hellings pláss til að hlaupa í. Hann tekur á rás í átt að teignum og á sendingu/skot þvert fyrir markið en Jóhann Helgi nær ekki að teygja sig í boltann.

Seinni hálfleikur hafinn

Gróttumenn hefja seinni hálfleik með boltann. Nú er að sjá hvort að gestirnir hafi einhver svör eftir áföll fyrri hálfleiksins!

Þriggja marka forysta Þórs í hálfleik!

Ærið verk fyrir höndum hjá gestunum frá Seltjarnarnesi en eftir að Björn Axel hafði verið hársbreidd frá því að jafna leikinn strax eftir mark Ásgeirs að þá hafa Þórsarar bætt við tveimur.

Heimamenn hafa verið þéttir til baka og nýtt sér mistök Gróttu frábærlega.

Það er kominn verulegur pirringur í gestina og Ágúst Gylfason getur væntanlega ekki beðið eftir hálfleiksflautinu til að skrúfa hausinn rétt á leikmenn.

Brekkan er orðin ansi brött fyrir Seltirninga og þeir fara ekki leynt með pirring sinn. Vatn á myllu Þórs.

Ég þarf hreinlega að afla mér upplýsinga um hvernig þetta mark átti sér stað!

Björn Axel í DAUÐAFÆRI! Gróttumenn ná að vinna sig vel inn í teig Þórs og Pétur Theódór á laust skot sem að berst til Björns, sem er aleinn rétt fyrir framan markteiginn. Hann hittir boltann hörmulega og boltinn fer langt framhjá!

Pétur Theódór kemur boltanum út á Björn Axel sem á skot í varnarmann og þaðan berst hann til Gunnars Jónasar. Boltinn kemur þó full flatt upp á hann og hann skallar boltann langt framhjá marki Þórs.

Jóhann Helgi gerir vel í að standa af sér tæklingu og kemur boltanum á Fannar Daða. Hann keyrir á Patrik sem tekst að stýra honum frá marki og Fannar reynir lága fyrirgjöf sem að Jón Ívan grípur örugglega í markinu.

Skalli framhjá! Sýndist það vera Júlí Karlsson. Honum tókst ekki að stýra boltanum á markið.

Gróttumönnum gengur talsvert betur að halda í boltann og fá hér aðra hornspyrnu. Gunnar Jónas tekur hana.

Hornspyrnur Kristófers Orra eru stórhættulegar og með turna á borð við Sigurvin Reynisson og Pétur Theódór inní teig að þá myndast óhjákvæmilega titringur í vörn Þórs.

Korter liðið og hingað til eru það stuðningsmenn Gróttu sem hafa stolið senunni.

Mikill darraðadans myndast í teignum! Gunnar Jónas Hauksson á svo fast skot á vítateigslínunni sem endar í varnarmanni Þórs og Gróttumenn vilja fá vítaspyrnu. Höfðu lítið til síns máls, held ég.

Axel og Patrik ná vel saman á hægri kantinum. Axel vinnur hornspyrnu eftir að Petar blokkar fyrirgjöf hans.

Axel Sigurðarson er tekinn niður. Fannar Daði sökudólgurinn. Grótta fær aukaspyrnu aftarlega á vallarhelmingi Þórs. Þórsarar hreinsa boltann í burtu og Grótta hefur nýja sókn.

Fannar Daði vinnur aukaspyrnu fyrir Þórsara úti á vinstri kantinum. Liban býr sig undir að taka spyrnuna inn á teig. Spyrnan er alltof föst og svífur yfir allan pakkann.

Jóhann Helgi kemur þessu af stað!

Liðin mætt til leiks og takast í hendur. Nú bíðum við bara eftir því að Gunnar Oddur, dómari leiksins, blási þetta í gang!

Nú var það staðfest á mánudaginn að enski leikmaðurinn Harley Willard myndi ganga til liðs við Þór eftir tímabilið. Willard hefur verið einn af lykilmönnum Víkings Ó. síðan að hann mætti til Ólafsvíkur 2019.

Liðin eru klár! Heitt í veðri, örlítil gola og farið að fjölga í stúkunni. Nokkrir galvaskir Seltirningar eru mættir til að styðja gula og bláa í dag. Þeir eru í fantastuði og láta vonandi vel í sér heyra!

Eins og alþjóð veit að þá er Þorpurum ekkert sérstaklega vel við litasamsetninguna gult/blátt og því má búast við hörkubaráttu.

Gróttumenn hafa verið á ágætis skriði undanfarið en síðustu þrír deildarleikir hafa unnist, nú síðast gegn Fjölni.

Í liði Gróttu er markahæsti leikmaður deildarinnar, Pétur Theódór Árnason, en hann er kominn með 12 mörk í deildinni og hreinlega farið á kostum.

Hlaðvarpið Dr. Football greindi frá því þann 20. júlí að Pétur væri búinn að skrifa undir hjá Breiðabliki og að framherjinn stæðilegi gengi til liðs við þá grænklæddu eftir að núverandi tímabil klárast. Þá myndi hann hitta fyrir Óskar Hrafn Þorvaldsson, þjálfara Blika og fyrrum þjálfara Gróttu, á nýjan leik.

Góðan og blessaðan daginn! Hér fer fram textalýsing á leik Þórs og Gróttu í Lengjudeild karla. Leikurinn er liður í 13. umferð deildarinnar og sitja liðin í 7. og 8. sæti - gestirnir frá Seltjarnarnesi sæti ofar. Þórsarar hafa nælt í 16 stig en Gróttumenn stigi meira.