SKÝRSLAN: Ríkjandi bikarmeistarar sundurspiluðu KR
Hvað réði úrslitum?
Víkingar voru miklu sprækari, KR-ingar virkuðu þungir og voru hreinlega yfirspilaðir. Víkingar gátu siglt sigrinum þægilega í höfn í seinni hálfleik.
Bestu leikmenn
1. Erlingur Agnarsson - Víkingur
Hefur fengið gagnrýni í sumar en skoraði sitt fyrsta mark á tímabilinu í kvöld auk þess að eiga stoðsendingu. Frábær í leiknum.
2. Kári Árnason - Víkingur
Margir Víkingar flottir en Kári var frábær áður en hann fór meiddur af velli í seinni hálfleik.
Atvikið
Víkingar skoruðu flott mörk í leiknum, sérstaklega annað markið þar sem þeir sundurspiluðu KR-inga glæsilega.
Hvað þýða úrslitin?
Víkingar, sem eru jú enn ríkjandi bikarmeistarar eftir sigurinn 2019, eru komnir í 8-liða úrslitin. Síðasti sigur Víkings gegn KR var í júlímánuði 2018.
Vondur dagur
KR-ingar gátu ekki gefið Víkingum leik og það væri hreinlega ósanngjarnt að taka einhvern sérstakan leikmann fyrir. Þetta var samheldið átak alls KR-liðsins í því að sýna dapra frammistöðu.
Dómarinn - 6
Er ekki sammála því þegar hann dæmdi óbeina aukaspyrnu á Víkinga. Ákvarðanir í spjaldagjöf voru heldur ekki alveg í takti. En annars fínt.