Leiknum er lokið með 5-0 sigri Skagamanna og vonin lifir hjá þeim!

Komnar 90mín á klukkuna og það er tveim mínútum bætt við. Það er ljóst að Skagamenn eru að lyfta sér upp úr fallsæti amk þangað til á morgun þegar HK spilar.

Gult spjald á bekkinn hjá Fylki.

Skagamenn næstum búnir að skora fimmta markið! Guðmundur Tyrfings með fyrirgjöf en Raggi Sig bjargar á línu.

Orri Hrafn við það að prjóna sig í gegnum vörn ÍA en Óttar gerir vel og skýlir boltanum þar til Árni nær til hans

Fylkismenn með hornspyrnu sem endar með skoti frá Orra en Árni ver vel.

Fylkismenn fá hérna tvær hornspyrnur í röð sem endar með skoti frá Orra en það er framhjá markinu.

Gísli Laxdal með skot á mark Fylkis en auðvelt fyrir Aron í markinu.

Skagamenn aðeins tæpir hérna að senda boltann á milli í öftustu línu en koma þessu frá á endanum.

VIKTOR JÓNS!!!! Viktor í dauðafæri í teignum en skotið hrein hörmung og beint á Aron í markinu. Þarna átti hann hreinlega að klára leikinn!

Steinar með hörku skot úr þröngu færi en Aron ver virkilega vel.

Fylkismenn byrja af krafti. Orri Hrafn labbar í gegnum hálft ÍA liðið en þeir bjarga á endanum.

Þá er þetta komið af stað hjá okkur aftur. Nú eru það Skagamenn sem byrja með boltann og sækja í átt að höllini.

Þess má geta að staða í leik Leiknis og Keflavíkur er 0-1 en sá leikur skiptir líka máli í fallbaráttunni.

Fylkismenn með skalla yfir eftir horspyrnu og Siugður flautar til hálfleiks

Það verður að hrósa stuðninsmönnum fyrir mætinguna og hvatninguna á leiknum. Stuðningsmenn beggja liða láta vel í sér heyra.

Lítið að gerast þessar mínútur á vellinum. Skagamenn meira með boltann án þess að skapa sér eitthvað.

Fyrsta alvöru sókn Fylkis í leiknum. Kemur eftir flott spil en sending fyrir markið og yfir allt og alla og aftur fyrir.

Aron Kristófer með horn af verri gerðinni, beint aftur fyrir!

Steinar með hörkuskot sem Aron ver vel.

Skagamenn mun meira með boltann fyrstu 20 mín leiksins og sérstaklega núna manni fleiri.

Skagamenn með horn og Sindri nær skalla en aldrei nein hætta.

Fyrsta færið! Hákon Ingi með fyrirgjöf og boltinn á Steinar vítateigslínunni en beint á Aron í markinu.

Bæði Ísak og Ásgeir liggja eftir smá skalla samstuð í teig ÍA en þeir hrista þetta af sér. Alvöru menn.

Davey fer niður í teig Fylkismanna og einhverjir að biðja um víti en ekkert í þessu. Bara áfram gakk.

Þá er þetta farið af stað hjá okkur og það eru Fylkir sem byrja með boltann og sækja í átt að höllini. Skagamenn að sjálfsögðu í gulum treyjum og svörtum buxum á heimavelli en Fylkismenn eru klæddir í alhvítt. Vonandi fáum við fullt af mörkum og mikið fjör!

Það eru um 10 mínútur í leik hjá okkur og liðin farin upp í klefa í loka pepp fyrir leikinn! Ekki laust við að það sé mikil spenna á vellinum

Byrjunarliðin eru klár. Bæði þessi lið voru að spila í átta-liða úrslitum Mjólkurbikarsins í síðustu viku. ÍA vann 3-1 sigur á ÍR. Frá þeim leik gerir Jóhannes Karl Guðjónsson fjórar breytingar. Þórður Þorsteinn Þórðarson, sem skoraði frábært mark gegn ÍR, er ekki með í dag. Wout Droste, Sindri Snær Magnússon, Viktor Jónsson og Steinar Þorsteinsson koma inn í liðið fyrir Þórð, Ólaf Val Valdimarsson, Brynjar Snæ Pálsson og Eyþór Aron Wöhler.

Ragnar Sigurðsson hefur verið frá vegna meiðsla hjá Fylki en hann byrjar á bekknum. Rúnar Páll Sigmundsson stillir upp sama liði og gegn Víkingi. Sá leikur fór í framlengingu þar sem Víkingar höfðu betur.

Dómari í dag er Sigurður Hjörtur Þrastarson og honum til aðstoðar eru Eðvarð Eðvarðsson og Sveinn Þórður Þórðarson. Varadómari er Gunnar Oddur Hafliðason. Þórður Ingi Guðjónsson ætlar svo að hafa eftirlit með þessum eðal mönnum.

Þess má til gamans geta að liðin hafa mæst 51 sinni í leikjum á vegum KSÍ og þar hefur Skaginn vinninnginn. Skagamenn hafa unnið 23 leiki, Fylkir hefur unnir 14 leiki og 14 sinnum hafa liðið gert jafntefli. Þá hafa Skagamenn skorað 89 mörk rn Fylkismenn 71 í þessum leikjum!

Skagamenn koma inní þennan leik með tvo sigra í röð en þeir unnu Leikni í síðasta deildarleik og svo slógu þeir ÍR út úr bikarnum. Gestirnir koma hins vegar með 5 töp í röð á bakinu. Þeir töpuðu síðasta deildarleik fyrir KA og fyrir Víking R. í bikarnum í síðasta leik.

Þetta hins vegar breytir ekki miklu ef einhverju þegar leikurinn byrjar. Þetta ætti að verða hörku leikur og mikil barátta, annað væru vonbrigði

Staðan er ekki mjög flókin fyrir þennan leik, bæði lið þurfa nauðsynlega sigur. Tap hjá heimamönnum í ÍA og ef Keflavík nær í stig á móti Leikni þýðir að Skaginn er fallinn. Sigur aftur á móti kemur þeim úr fallsæti amk þangað til á morgun þegar HK spilar.

Staðan er ekki ósvipuð hjá Fylkismönnum. Tap þýðir að þeir sitja á botninum fyrir lokaumferðina en þeir geta samt þá ennþá bjargað sér. Og með sigri þá lyfta þeir sér úr fallsæti amk tímabundið eins og Skaginn!

Það er enginn smá leikur sem við erum að fara að fylgjast með. Bæði lið eru í bullandi fallbaráttu en liðin sitja í tveimur neðstu sætunum, ÍA í tólfta sæti og Fylkir í því ellefta með stigi meira.

Heilir og sælir lesendur góðir og verið velkomin í beina textalýsingu frá leik ÍA og Fylkis á Norðurálsvellinum á Akranesi.