Komið þið sæl og verið velkomin í beina textalýsingu frá Leiknisvelli. Hér mætast Leiknir og Fjölnir í 1. deild karla en það er alltaf líf og fjör þegar þessi tvö lið mætast og nóg af mörkum. Leikurinn er í 20. umferð. Fjölnismenn eiga enn tölfræðilega möguleika á að ná öðru sæti deildarinnar en það verður að teljast mjög ólíklegt að svo verði raunin. Leiknir er í djúpum skít í fallsæti, sex stigum frá öruggu sæti í deildinni. Breiðhyltingar verða að ná í þrjú stig í kvöld til að halda í vonina um að halda sæti sínu í deildinni. Þeir sem skrifa færslur um leikinn á Twitter eru minntir á að nota hashtagið #fotbolti en valdar færslur verða birtar í þessari textalýsingu.

Byrjunarliðin eru komin. Pape Mamadou Faye sem mikið hefur verið í umræðunni eftir að hann rauk heim fyrir tapleik gegn Haukum í síðustu umferð er í byrjunarliði Leiknis. Hjá Fjölni er Steinar Örn Gunnarsson kominn í markið þar sem Hrafn Davíðsson er farinn út í nám.

Tíu mínútur í leik. Það hefur verið hlýrra hér í Breiðholtinu. Svo sannarlega haustveður í lofti og ekki ólíklegt að það muni rigna. Ljúfir tónar hljóma frá Oscari Clausen plötusnúð kvöldsins en ekkert sést til DJ Þóris sem hingað til hefur séð um tónlistina á Leiknisvelli.

Leikurinn er farinn af stað. Fjölnismenn sækja í átt að Breiðholtslauginni. Það er öllu fámennara en þegar þessi tvö lið áttust við í fyrra enda gat Leiknir þá tryggt sér sæti í Pepsi-deildinni. Í dag berst Leiknir við falldrauginn. Leiknisfólk í stúkunni lætur vel í sér heyra en stuðningsmenn Fjölnis má telja á fingrum annarrar handar.

Leiknismenn hafa verið öflugri í þessum leik. Þórir Guðjónsson með skottilraun en knötturinn talsvert yfir markið.

Það er kominn hálfleikur. Fjölnismenn voru nokkuð líflegir undir lok hálfleiksins en annars fyllilega verðskulduð staða.

Seinni hálfleikur er hafinn. Pape Mamadou Faye með stangarskot úr sannkölluðu dauðafæri, þarna átti hann að skora! Flott sókn hjá Leikni.

Eyjólfur Tómasson markvörður Leiknis varði glæsilega rétt í þessu. Besta tilraun Fjölnis í leiknum.

Þórir Guðjónsson með hörkuskot að marki Fjölnis en boltinn naumlega framhjá. Vel gert hjá Þóri sem er hjá Leikni á lánssamningi frá Val.

Með ólíkindum að Leiknir hafi ekki náð að bæta þriðja markinu við. Fjölnismenn í algjörri nauðvörn og Steinar í markinu bjargaði tvívegis glæsilega í sömu sókn.

Leiknismenn farnir að tefja út við hornfána.

Leik lokið! Lífsnauðsynlegur sigur Leiknis sem vel hefði getað orðið stærri. Liðið á enn von um að bjarga sér frá falli.