SKÝRSLAN: Hundfúll varamaður tryggði Val stigin þrjú
Hvað réði úrslitum?
Ætli gæðin á sóknarþriðjungi Valsmanna hafi ekki skilað þeim þessum sigri. Valur fékk nokkur tækifæri til að skora annað markið, rétt áður en Arnór Smárason gerði það sem Heimir Guðjónsson þjálfari Vals beið eftir.
Bestu leikmenn
1. Guðmundur Andri Tryggvason
Skoraði fyrsta markið og lagði upp sigurmarkið. Fékk tækifæri til að skora fleiri en brást bogalistin.
2. Birkir Már Sævarsson
Alltaf sama gamla dísel vélin. Traustur, áræðinn og kraftur í hægri bakverðinum. Ekkert rugl og engir stælar.
Atvikið
Arnór Smárason kom inná sem varamaður á 69. mínútu leiksins og var búinn að koma Valsmönnum yfir í leiknum rúmlega tíu mínútum síðar sem reyndist sigurmarkið. Arnór var gagnrýndur fyrir sína spilamennsku ásamt öðrum liðsfélögum hans í Val á síðasta tímabili. Þetta mark vonandi kveikir í Arnóri sem samkvæmt Heimi Guðjónssyni var allt annað en sáttur að hafa byrjað á bekknum í þessum leik.
Hvað þýða úrslitin?
Valur er komið með þrjú stig á töfluna á meðan ÍBV þarf að bíða fram í næstu umferð til að sækja sín fyrstu stig í Bestu deildinni.
Vondur dagur
Heimir Guðjónsson staðfesti í viðtali eftir leik að Orri Sigurður Ómarsson sé með slitið krossband. Það eru gríðarlega slæm tíðindi bæði fyrir Val og að sjálfsögðu Orra sjálfan sem missir þar af leiðandi af öllu tímabilinu.
Dómarinn - 8,2
Hörkuleikur, mikið fjör en Þorvaldur gerði þetta vel.