SKÝRSLAN: Draumabyrjun KA en mikið ef og hefði
Hvað réði úrslitum?
KA menn voru betri heilt yfir í leiknum og stóðu verðskuldað uppi sem sigurvegarar. Eyjamenn munu eflaust horfa í einhver 'ef og hefði' augnablik en ef horft er í spilamennsku liðsins þá átti það ekki skilið neitt út úr þessum leik. Lungað úr fyrri hálfleik var KA mun betra liðið á vellinum og uppskar verðskuldað opnunarmark í uppbótartíma fyrri hálfleiks. Eyjamenn byrjuðu seinni hálfleikinn vel, tókst að jafna en markið fékk ekki að standa og í kjölfarið kláraði KA verkefnið og tók þrjú stigin með sér norður.
Bestu leikmenn
1. Nökkvi Þeyr Þórisson
Nökkvi er kominn á blað strax í annarri umferð eftir að hafa verið lengi að skora sitt fyrsta mark í fyrra. Hraðinn og krafturinn í honum olli usla oft á tíðum í varnarlínu ÍBV og í samvinnu við Bryan þá skapaðist mikið hætta úti vinstra megin. Skoraði annað markið og á risaþátt í þriðja markinu.
2. Ívar Örn Árnason
Eins og klettur í öftustu línu hjá KA. Það verður fróðlegt að sjá hvað Arnar gerir þegar Dusan kemur úr banni. Á þessari stundu tæki ég frekar Bykov úr liðinu heldur en Ívar. Ég er reyndar enginn þjálfari...
Atvikið
Rangstaðan sem dæmd var á Breka þegar Felix skoraði. AD2 og Helgi Mikael mátu það sem svo að Breki truflaði Steinþór þegar Felix skaut á markið. Ómögulegt að sjá við fyrstu sýn en þeir virtust mjög vissir í sinni sök.
Hvað þýða úrslitin?
KA menn eru með fullt hús, hafa til þessa ekki fengið á sig mark og strax fjórir markaskorarar komnir á blað. Eyjamenn eru án stiga og mæta næst liði Leiknis sem einnig er án stiga.
Vondur dagur
Guðjónarnir tveir í liði ÍBV áttu erfitt uppdráttar. Nökkvi og Bryan létu Guðjón Erni ekki í friði og spurning hvort Tómas Bent hefði getað hjálpað meira. Maður býst við að sjá meira frá Guðjóni Pétri en hann var einnig svolítið hægur í gang í fyrstu umferðunum í fyrra. Hann á meira en nóg inni!
Svo voru 522 manns mættir að horfa á leikinn, ríflega 500 stuðningsmenn ÍBV. Það heyrðist varla múkk í þeim nema tuð í dómara og andstæðingum og stuðningurinn við liðið lítill sem enginn. Það verður að vera betri stuðningur við liðið í sumar ef liðið ætlar sér að ná sínum markmiðum.
Dómarinn - 5,5
Óskiljanlegt að ekki var dæmt víti á Bryan þegar boltinn fór í höndina á honum eftir snertinguna frá Andra Rúnari. AD2 fær toppeinkunn (dæmdi hárrétt rangstöðu) en AD1 og Helgi Mikael áttu í sameiningu að sjá að ÍBV átti að fá víti.