SKÝRSLAN: Fjórði sigur Vals á KR í röð
Hvað réði úrslitum?
Það var ekki mikið sem skildi liðin af í kvöld. Bæði lið fengu tækifæri til að skora fleiri mörk og Valur þá sérstaklega en hættulegustu færi leiksins komu eftir skyndisóknir hjá báðum liðum. Sigurmarkið kom einmitt eftir skyndisókn Vals en vissulega beint úr aukaspyrnu eftir að brotið hafi verið á Patrick Pedersen.
Bestu leikmenn
1. Jesper Juelsgård
Þrátt fyrir að hafa sofið aðeins á verðinum í fyrsta marki KR þá fær Jesper þennan titil fyrir sigurmarkið sem var af dýrari gerðinni.
2. Birkir Már Sævarsson
Fyrirgjöfin í fyrsta markinu, frábær. Varnarlega traustur. Sóknarlega mikilvægur. Ég að skrifa um Valsleik og Birkir Már á meðal bestu manna... ekki í fyrsta skiptið.
Atvikið
Ég myndi treysta Þorgrími Þráinssyni til að skrifa bók um sigurmark Vals. Aðdragandinn er hinsvegar aðal sögulínan en KR-ingar eru æfir yfir því að Helgi Mikael hafi ekki dæmt aukaspyrnu þegar Theodór Elmar missir boltann á miðjunni og í kjölfarið keyra Valsmenn upp þar sem brotið er á Patrick Pedersen. Aukaspyrnan frá Jesper Juelsgård er síðan annað mál.
Hvað þýða úrslitin?
Þriðji sigur Vals í röð sem eru með fullt hús stiga. Annað tap KR í röð í deildinni sem hafa safnað þremur stigum í fyrstu þremur umferðunum.
Vondur dagur
Þrír leikmenn KR þurftu að fara af velli vegna meiðsla. Atli Sigurjónsson strax eftir tæpan hálftíma leik og þá þurfti Pálmi Rafn og Kennie Chopart að fara af velli snemma í seinni hálfleik.
Dómarinn - 6
Nokkur risa atvik í leiknum sem er vel hægt að gagnrýna hann fyrir. Svo má vel vera að einhver af þeim hafi verið hárrétt en önnur ekki. KR-ingar eru brjálaðir yfir aðdragandanum af sigurmarki Vals. Eins er erfitt að sjá að Kjartan Henry hafi verið brotlegur þegar Guy Smit hleypur aftan á bakið á honum innan teigs. Svo er spurning hvort Kjartan Henry hafi átt að fá rautt spjald eða ekki neitt spjald þegar Helgi fór milliveginn og gaf honum gult spjald fyrir athyglisverða tæklingu á miðjum vellinum þegar tveir leikmenn lágu eftir.