SKÝRSLAN: Þrjú stig til Grindavíkur í mjög bragðdaufum leik
Hvað réði úrslitum?
Aukaspyrna Kristófer Pálls Viðarssonar réði úrslitum hitti boltann vel og nýtti sér vindinn til þess að setja boltann á markið og í netið fór hann. Annars var leikurinn ekki mikið fyrir augað og fátt um fína drætti.
Bestu leikmenn
1. Kristófer Páll Viðarsson
Gæði í markinu skila honum þessu. Lipur í fótunum og verður gaman að sjá hvernig hann smellur inn í þetta lið Grindavíkur þegar líður á sumarið.
2. Vladimir Dimitrovski
Klettur til baka, gerir fá mistök og öruggur á boltann. Solid frammistaða í dag.
Atvikið
Aukarspyrna Kristófers er augljóst val en ég kýs að horfa í aðra átt. Undir lokin fauk tómur blár Maryland kexpakki um völlinn og gladdi okkur í blaðamannastúkunni að sjá hve fallega glampaði á hann á daufum punkti í leiknum. Nei að öllu gamni slepptu aukaspyrna Kristófers var góð og þess eðlis að hann átti það skilið að hún skilaði sigurmarki. Svo má minnast á stuðningsmenn Fylkis sem fögnuðu jöfnunarmarki of snemma þegar dómari leiksins dæmdi í raun aukaspyrnu. Gef þeim það þó að handabending dómarans var talsvert villandi og vorum við í blaðamannaboxinu alls ekkert vissir um stund sjálfir.
Hvað þýða úrslitin?
Grindavík hoppar í þriðja sæti deildarinnar með átta stig. stigi á eftir Gróttu í 2.sæti og tveimur stigum á eftir toppliði Selfoss. Fylkir sæti neðar með sjö stig.
Vondur dagur
Það verður aldrei auðvelt að spila fótbolta á hörðum þurrum velli í svona vindi. Setjum fótboltann í vondan dag enda átti hann aldrei séns í Grindavík
Dómarinn - 7
Eitt og annað sem var ekki upp á 10 hjá Aðalbirni en heilt yfir bara fínasti leikur hjá honum og engin stórvægileg mistök.