SKÝRSLAN: Vestri og Kórdrengir komast ekki af stað
Hvað réði úrslitum?
Liðin réðu illa við stungusendingar og komu þrjú af fjórum mörkum þá leið. Vestramenn eiga erfitt með að halda búrinu hreinu og þau vandræði héldu áfram þrátt fyrir að skipt hafi verið yfir í fimm manna vörn fyrir þennan leik. Þeir sýndu þó flottan karakter eftir 0-5 sigur að koma tilbaka úr 0-2 stöðu.
Bestu leikmenn
1. Vladimir Tufegdzic
Skoraði eitt og lagði upp annað. Var aðalmaðurinn í endurkomu Vestra og steig upp eftir meiðsli Nicolaj Madsen þegar heimamenn þurftu virkilega á að halda.
2. Þórir Rafn Þórisson
Skoraði fyrsta markið og var hættulegasti maður gestanna. Mikil ógn af honum og hann átti auðvelt með að skapa usla þegar hann komst einn gegn varnarmanni út á köntum.
Atvikið
Mark Vladimir Tufegdzic (Tufa) gjörbreytti ásýnd seinni hálfleiksins. Kom rétt fyrir hálfleik, Vestra menn 0-2 undir og mikil deyfð yfir leik þeirra. Markið reif þá upp og gaf þeim trú á verkefni seinni hálfleiksins.
Hvað þýða úrslitin?
Lið sem margir töldu að gætu blandað sér í toppbaráttu eru ekki að ná að næla í sigra. Þau þurfa að fara að vinna fleiri leiki ef þau ætla ekki að sitja eftir, bæði með einn sigur í sex fyrstu leikjunum.
Vondur dagur
Finnst búa svo miklu meira í Pétri Bjarnasyni. Stundum eins og hann sé fastur í þriðja gír. Hefur hæfileikana og líkamann í að verða yfirburðarmaður í þessari deild en það vantar smá malt í hann hér í upphafi móts.
Dómarinn - 7
Eitt og eitt vafaatriði í leiknum sem ég get samt ekki fullyrt að hafi ekki verið rétt dæmt. Stundum of lítið flot á leiknum þar sem hann flautaði of oft á smá púst.