SKÝRSLAN: Stál í stál á Origo vellinum
Hvað réði úrslitum?
Leikurinn var mjög lokaður af eðlisfari og spilaði það rullu að þetta var fyrsti leikur eftir rúmlega mánaðar landsleikjarhlé. Liðin spiluðu agaðan varnarleik og hjá báðum liðum vantaði oft á tíðum úrslitasendinguna í sóknum.
Bestu leikmenn
1. Cyera Makenzie Hintzen
Var aðalógn Valsmanna, skoraði frábært mark og hikaði ekki við að keyra á vörn Stjörnunnar.
2. Gyða Kristín Gunnarsdóttir
Gyða átti góðan dag hjá Stjörnunni, átti góða stoðsendingu á Katrínu og spilaði heilt yfir vel í dag.
Atvikið
Ekki úr mörgu að velja en jöfnunarmark Valsara hafði mikil áhrif á leikinn. Leikurinn hafði opnast verulega eftir mark Stjörnunnar en eftir mark Cyera Hintzen lokaðist leikurinn allhressilega og endaði staðan eftir því 1-1.
Hvað þýða úrslitin?
Úrslitin þýða það að Valur heldur toppsætinu en Breiðablik færist nær, nú aðeins 2 stig sem skilja liðin að. Stjarnan fylgir þar á eftir í 3. sæti 6 stigum á eftir Val
Vondur dagur
Enginn sérstakur leikmaður með vondan dag, en það má benda á að Þórdís Elva var klaufi að missa boltann á hættulegu svæði á vellinum í marki Stjörnunnar. Þórdís átti þrátt fyrir það fínasta leik í dag.
Dómarinn - 8
Þórður Þorsteinn Þórðarson dæmdi sinn fyrsta leik í efstu deild í dag, hann hafði góð tök á leiknum og ekkert hægt að sakast við hann. Þórður mjög flottur í dag.