SKÝRSLAN: Breiðablik náði fram hefndum gegn Keflavík
Hvað réði úrslitum?
Mark Clöru í blálok fyrri hálfleiks gerði mikið fyrir Blika og sló Keflavík út af laginu. Fram að því var leikurinn keimlíkur fyrri leik liðanna þar sem Blikum virtist fyrirmunað að skora. Markið færði þeim þó aukna trú og dró úr krafti Keflavíkur og gerði síðari hálfleikinn mun þægilegri fyrir þær grænklæddu.
Bestu leikmenn
1. Birta Georgsdóttir
Hefði getað verið komin með þrjár fjórar stoðsendingar fyrir hlé, var mikið að skapa en framan af vantaði liðsfélögum hennar að reka endahnútinn á. Spilaði þó vel og uppskar gott mark er hún tímasetti hlaup vel inn á teiginn og skoraði með góðum skalla.
2. Clara Sigurðardóttir
Mikið í boltanum og gerði vel. Kláraði sitt hlaup á lokasekúndum fyrri hálfleiks og kom boltanum í netið og lyfti þungu fargi af liði sínu.
Atvikið
Á 11. mínútu leiksins kom Breiðablik boltanum í netið eða nánar til tekið Natasha Anasi. Blikaliðið fagnaði vel og innilega undir dynjandi tónlist og kynnti vallarþulur markaskorara undir dynjandi lófataki. Gallinn var þó að Þórður Þorsteinn Þórðarson dómari leiksins var löngu búinn að dæma brot og þar með markið ógilt. Skemmtilegt atvik þó á að horfa.
Hvað þýða úrslitin?
Breiðablik fer í 27 stig og minnkar forskot Vals niður í tvö stig og titilbaráttan harðnar enn frekar. Keflavík áfram með 10 stig í 7.sæti deildarinnar.
Vondur dagur
Þessi reitur er óvenju erfiður í kvöld. Verður ekki tekið af liði Keflavíkur og þær reyndu og vörðust oft á tíðum hetjulega sem dugði þó skammt í þetta sinn. Án þess þó að segja að hún hafi átt slæman leik hafði Sigurrós Eir Guðmundsdóttir nóg að gera í vinstri bakverðinum lengst af og sér örugglega grænar treyjur allt í kring þegar hún lokar augunum í kvöld.
Dómarinn - 8
ÞÞÞ var góður í kvöld að mínu mati. Yfirvegaður á velli en ákveðinn þegar þess þurfti. Engin stór atvik sem ég get skellt á hann að hafi verið röng. Vel dæmt.