SKÝRSLAN: Þrjú stig til Keflavíkur eftir skelfilega sendingu
Hvað réði úrslitum?
Sjá 'Atvikið'. Annars var þetta frekar mikill 50:50 leikur, bæði lið fengu góð færi til að komast í 2-1 stöðuna en þriðja markið kom ekki fyrr en í uppbótartíma.
Bestu leikmenn
1. Sindri Kristinn Ólafsson
Varði stórkostlega frá Zean í stöðunni 1-1 og er ásamt Frans ástæðan fyrir því að Keflavík vann í dag.
2. Zean Dalügge
Fyrsti leikurinn hjá lánsmanninum frá Lyngby og hann var sprækur í leiknum, skorar virkilega gott mark og er sjáanlega með mjög mikil gæði. Leikmnenn eins og Dagur, Nacho og Patrik gera einnig tilkall í þetta box.
Atvikið
Sendingin slæma frá Gyrði sem Frans kemst inní í uppbótartíma. Frans skorar sigurmarkið eftir þessi slæmu mistök Gyrðis sem sat eftir á vellinum eftir leik og leið augljóslega illa með þetta atvik.
Hvað þýða úrslitin?
Leiknir er áfram í fallsæti en Keflavík er nær sjötta sætinu. Liðið mætir KR í næstu umferð og kemst upp í efri hluta deildarinnar með sigri. Framfarir í leik Leiknis frá síðustu leikjum en skilar sér í núll stigum.
Vondur dagur
Ég var búinn að undirbúa þetta box fyrir lélegar langar sendingar hjá báðum liðum, sérstaklega úr öftustu línu hjá Keflavík og frá Viktori í marki Leiknis. En lesið aftur 'Atvikið' - Gyrðir gerði mistök sem hann vill án efa gleyma.
Dómarinn - 7
Ágætlega dæmdur leikur hjá Vilhjálmi, spurning með spjald á Frans í fyrri hálfleik og möguleg brot hér og þar en ekkert stórvægilegt og var með fínustu tök.