Liðin að ganga til vallar og örfáar mínútur í að þetta fari af stað. Vonumst að sjálfsögðu eftir skemmtilegum og spennandi leik.

Óskar Hrafn fer yfir málin með kollega þegar hann mætir í stúkuna

Byrjunarliðin mætt hér til hliðar Verður ekki annað sagt en að Blikar stilli upp afar sterku liði hér í kvöld. Vantar vissulega Viktor Örn sem tekur út leikbann en ég held ég geti fullyrt að allir ellefu sem byrja leikinn hjá Blikum gætu gert tilkall í byrjunarliðssæti í öllum öðrum liðum Bestu deildar karla. Kemur á móti nokkuð á óvart að sjá uppstillingu Víkinga og nöfn eins og Pablo Punyed, Niko Hansen og Matta Vill á bekknum. Er Arnar að halda spilunum að sér eða er hann að reyna einhvern taktískan leik?

Þjálfararnir í Innkastinu Þjálfarar þessara tveggja liða mættu báðir í hlaðvarpsviðtöl á skrifstofu Fótbolta.net í síðustu viku. Hægt er að finna þættina á hlaðvarpsveitum eða í tenglunum hér að neðan:

Upphitun Innkastsins - Arnar Gunnlaugsson

Upphitun Innkastsins - Óskar Hrafn Þorvaldsson

Spámenn dagsins Fjölbreyttur hópur manna spáði fyrir mig í leik kvöldsins og er nokkuð ljóst að fyrirfram búast menn við jöfnum og spennandi leik og skiptast menn jafnt á milli eftir því hvoru liðinu þeir spá sigri.

Spekingar spá í spilin fyrir Meistarar meistaranna

Óskar Hrafn í stúkunni. Þjálfari Breiðabliks Óskar Hrafn Þorvaldsson tekur út leikbann eftir að hafa fengið að líta rauða spjaldið frá einmitt Erlendi Eiríkssyni í lokaleik síðasta tímabils gegn Víkingum. Hann þarf því að gera sér að góðu að sitja í stúkunni og fylgjast með leiknum eins og hinn almenni áhorfandi.

Dómarar
Erlendur Eiríksson heldur um flautuna á Kópavogsvelli í kvöld. Honum til halds og trausts eru þeir Andri Vigfússon og Ragnar Þór Bender. Vilhjálmur Alvar Þórarinsson er fjórði dómari og efirlitsmaður KSÍ er Jón Sigurjónsson.

Víkingar að fá leikmann frá Víkingum Færeyski landsliðsmaðurinn Gunnar Vatnhamar er samkvæmt heimildum færeyskra miðla að ganga til liðs við Arnar Gunnlaugsson og Víkinga frá liði Víkings í Götu frá Færeyjum.

Gunnar er 28 ára gamall miðvörður sem hefur leikið fyrir Víking í Götu allan sinn feril. Hann getur einnig leikið sem miðjumaður.

Hann á að baki 259 leiki og 43 mörk fyrir Viking í Færeyjum ásamt því að hafa lagt upp 15 mörk. Hann hefur tvisvar sinnum unnið færeysku úrvalsdeildina.

Nafn nýja félagsins hans ætti þá allavega ekki að vefjast fyrir honum.

Breiðablik Blikar, ríkjandi Íslandsmeistarar, fyrstu sigurvegarar Bestu deildar karla freista þess nú að kveða algjörlega niður öll þau orð um að þeir séu ekkert endilega besta lið landsins þó frábærir séu. Liðið klárlega eitt af þeim skemmtilegri í deildinni ef ekki það skemmtilegasta og verður annaðhvort á eða við toppinn þegar talið verður upp úr hattinum í haust. En fyrst þessi leikur og einn bikar á þeirri vegferð sem fótboltasumarið er.

Blikar verða ekki sakaðir um að hafa verið latir á félagaskiptamarkaðnum og er staðan í rauninni sú að sumum finnst nóg um. Færeyskt dúó í framlínuna? Verður Alex Freyr fyrstur í agabann? Nútímaútgáfa af Gústa Púst og eldflauginn úr Mosó Eyþór Wöhler er ekki einu sinni helmingurinn af þeim leikmönnum sem Breiðablik hefur sankað að sér í vetur. Breiddin er góð en mun Óskar Hrafn hafa burði til þess að halda öllum þessum gæðaleikmönnum ánægðum og á tánum. Það getur tíminn einn leitt í ljós.



Komnir

Alex Freyr Elísson frá Fram
Arnór Sveinn Aðalsteinsson frá KR
Ágúst Eðvald Hlynsson frá Horsens (var á láni hjá Val)
Ágúst Orri Þorsteinsson frá Malmö
Eyþór Aron Wöhler frá ÍA
Klæmint Olsen á láni frá NSÍ Runavík
Oliver Stefánsson frá Norrköping (var á láni hjá ÍA)
Patrik Johannesen frá Keflavík
Stefán Ingi Sigurðarson frá HK (var á láni)

Farnir
Dagur Dan Þórhallsson til Orlando
Elfar Freyr Helgason í Val
Ísak Snær Þorvaldsson til Rosenborg
Mikkel Qvist
Pétur Theódór Árnáson á láni til Gróttu
Sölvi Snær Guðbjargarson í frí
Omar Sowe til Leiknis (var á láni frá NY Red Bulls)
Adam Örn Arnarson í Fram (var á láni hjá Leikni)
Benedikt Warén í Vestra (var á láni hjá ÍA)

Víkingur Víkingar eru klárlega eitt af þeim liðum sem munu slást um stóru titlana þetta sumarið. Liðið undir stjórn Arnars Gunnlaugssonar er eitt af þeim bestu hérlendis og verður spennandi að sjá þá reyna að endurheimta Íslandsmeistaratitilinn sem Blikar hirtu af þeim á síðasta tímabili. En fyrst freista þeir þess að verja titilinn meistarar meistaranna sem þeir unnu í fyrra einmitt með sigri á Breiðablik.

Víkingar hafa verið rólegri á félagaskiptamarkaðnum þennan veturinn en oft áður en að hafa að sama skapi haldið nokkuð vel í sinn mannskap þó brotthvarf fyrirliðans Júlíusar Magnússonar skilji eftir skarð sem er vandfyllt. Matthías Vilhjálmsson gekk til liðs við Víkinga frá FH og má vænta þess að hann komi með mikla reynslu í sóknarleik Víkinga og komi til með að styrkja liðið nokkuð. Þá gekk miðvörðurinn ungi Sveinn Gísli Þorkelsson til liðs við Víkinga frá ÍR. Fyrirfram gerir maður ráð fyrir að þar hafi Arnar verið að hugsa til framtíðar enda Sveinn kornungur að árum en mun að öllum líkindum fá mun stærra hlutverk í varnarleik Víkinga en ætla mátti fyrirfram eftir að ljóst varð að Kyle McLagan myndi ekkert vera með Víkingum í sumar en hann sleit krossbönd á dögunum.




Komnir
Matthías Vilhjálmsson frá FH
Sveinn Gísli Þorkelsson frá ÍR

Farnir
Adam Ægir Pálsson í Val (var á láni hjá Keflavík)
Júlíus Magnússon til Fredrikstad
Kristall Máni Ingason til Rosenborg

Formlegt upphaf knattspyrnutímabilsins 2023!
Það er loksins komið að því. Að loknum löngum vetri er íslensk knattspyrna loks að rúlla af stað á ný með formlegum hætti. Meistarar meistaranna árlegur leikur Íslandsmeistara og Bikarmeistara markar formlegt upphaf keppnistímabilsins sem við höfum lengi beðið eftir.

Í kvöld mætast Breiðablik sem urðu Íslandsmeistarar með yfirburðum í fyrra og bikarmeistarar Víkinga.