SKÝRSLAN: Iðnaður og sofandi aðstoðardómari á gulum frjálsíþróttavelli
Hvað réði úrslitum?
Leikurinn var jafn og spennandi eins og við mátti búast. FH vann 1-0 iðnaðarsigur með ljómandi fínu marki en Garðbæingar geta skiljanlega verið svekktir, áttu sláarskot og klúðruðu víti. Aðstæður höfðu sitt að segja, spilað var á gulum frjálsíþróttavelli FH-inga og í raun hefði verið réttast að fresta þessum leik og spila við betri aðstæður síðar.
Bestu leikmenn
1. Vuk Oskar Dimitrijevic - FH
Er að byrja mótið frábærlega, skoraði laglegt mark sem réði úrslitum, eftir gott samspil við Kjartan Henry Finnbogason.
2. Logi Hrafn Róbertsson - FH
Var öflugur og hefði náð stoðsendingu ef Gyrðir hefði nýtt dauðafæri í leikin.
Atvikið
Vítaklúður Stjörnunnar og svo laglegt sigurmark FH eru atvikin úr þessum leik sem munu lifa þegar hann er rifjaður upp.
Hvað þýða úrslitin?
FH-ingar eru sáttir við uppskeruna eftir tvo fyrstu leikina en Stjarnan hefur ekki skorað mark og er stigalaust. Næsti deildarleikur liðsins er gegn HK og spennandi að sjá hvernig þeir bláu mæta til leiks.
Vondur dagur
Jóhann Árni Gunnarsson klúðraði víti fyrir Stjörnuna í fyrri hálfleik, slök spyrna. Stjörnumenn voru alls ekki síðri aðilinn í þessum leik en ekkert kom út úr sóknarmanninum Joey Gibbs sem átti einnig vondan dag.
Dómarinn - 7 / 4
Vallaraðstæður gerðu leikinn meira krefjandi fyrir dómarana og þá var fínt að hafa reynsluboltann Erlend Eiríksson með flautuna. Hinsvegar er það aðstoðardómarinn Kristján Már Ólafs sem gerði slæm mistök í víti Stjörnunnar. Sindri markvörður FH var kominn vel af línunni og það hefði átt að endurtaka spyrnuna. Falleinkunn á Kristján en aðrir í teyminu gerðu vel!