SKÝRSLAN: Gegnheil frammistaða Víkinga í erfiðum aðstæðum
Hvað réði úrslitum?
Víkingar byrjuðu leikinn betur, voru heilt yfir ofan á í leiknum, gæðameiri, þéttari og það var ekki fyrr en í lokin sem Fylkir virkaði sem líklegra liðið til að skora. Eina ógn Fylkis framan af voru föst leikatriði á meðan spil Víkings kom þeim reglulega í álitlegar stöður.
Bestu leikmenn
1. Oliver Ekroth
Mark, stoðsending og hélt markinu hreinu. Ekki hægt að byrja um meira. Markahæsti leikmaður deildarinnar sem stendur.
2. Birnir Snær Ingason
Hann og Logi tengdu vel úti vinstra megin og fékk Birnir mikið pláss til að vinna með, sérstaklega í upphafi leiks. Hann kom Víkingum á bragðið og var besti maður vallarins í fyrri hálfleik.
Atvikið
Annað markið fór langt með þetta, kom eftir að hornspyrna var tekin stutt, Logi fékk boltann og teiknaði hann á fjær þar sem Oliver var klár í að skalla að marki. Sláin inn niðurstaðan og staðan mjög vænleg.
Hvað þýða úrslitin?
Víkingur er á toppi deildarinnar með fullt hús stiga og hefur enn ekki fengið á sig mark til þessa. Fylkir er án stiga eftir fyrstu tvo leikina.
Vondur dagur
Kom ekki mikið út úr Óla Kalla í leiknum, komst ekki mikið í boltann og tilraunir hans rötuðu ekki á markið. Hvort sem það var hans eigin spilamensku, upplegginu eða frábærum varnarleik Víkings að þakka að Óli Kalli sást lítið veit ég ekki en hann kom ekki með mikið að borðinu.
Veðrið átti einnig afspyrnu slæman dag, ömurlegt veður og aðstæður erfiðar.
Dómarinn - 7,5
Fínasti leikur hjá Sigurði. Kallað eftir rauðu spjaldi og vítaspyrnum en virkaði við fyrstu sýn réttar ákvarðanir hjá Þrastarsyni.