SKÝRSLAN: Örugglega mikið högg í magann að þetta atvikist svona
Hvað réði úrslitum?
Valsmenn stjórnuðu ferðinni í fyrri hálfleik en náðu ekki að skapa sér nægilega góð færi. Þeir lentu undir gegn gangi leiksins eftir rúmlega hálftíma leik. Valur jafnaði svo eftir að hafa fengið ódýra vítaspyrnu. Fram var að spila mun betur í seinni hálfleik en þeir gerðu í þeim fyrri, það var meiri kraftur í þeim þá og þeir voru mjög líklegir til að komast yfir. Valsmenn komust hins vegar í gegnum þennan erfiða kafla, þeir eru með mikil gæði í sínum herbúðum og náðu að ganga frá leiknum á síðustu 20 mínútunum eftir frekar mikla pressu frá heimamönnum. Þessi leikur hefði í raun getað dottið hvoru megin sem var í seinni hálfleik, en Valsarar nýttu færin betur. Þetta var kannski ekki fallegasti sigur í heimi en gestirnir lögðu mikið á sig til að ná honum.
Bestu leikmenn
1. Adam Ægir Pálsson (Valur)
Stoðsendingakóngurinn frá því í fyrra hóf vegferð sína að því að vinna verðlaunin aftur í ár. Lagði upp mörkin tvö sem skiluðu Val sigrinum; hans fyrstu stoðsendingar í Bestu deildinni í ár. Sýndi mikil gæði, sérstaklega í þriðja markinu. Var óheppinn að skora ekki líka.
2. Frederik Schram (Valur)
Breytti leiknum mikið fyrir Val með því að verja vítaspyrnu í seinni hálfleiknum. Það hefði gjörbreytt leiknum ef Fram hefði skorað úr þeirri spyrnu. Besti markvörður deildarinnar, engin spurning. Tryggvi Hrafn Haraldsson gerir líka sterkt tilkall hérna en innkoma hans var frábær.
Atvikið
Vítaspyrnan sem Frederik varði. Og svo eiginlega meira þegar Aron Jóhannsson bjargar á línu fyrir Val á 73. mínútu. Mér fannst vera meðbyr með Fram á þeim tíma, þeir voru líklegri en Aron bjargar á línu og beint í kjölfarið fer Valur upp í sókn og skorar annað markið. Þetta var örugglega mikið högg í magann fyrir Fram - sem var búið að vinna sig ágætlega inn í leikinn - að þetta atvikist svona, að fá á sig mark tíu sekúndum eftir að Valur bjargar á línu. Þetta var leikurinn, þriðja markið var mikilvægasta markið í leiknum á þessum tímapunkti.
Hvað þýða úrslitin?
Valur er með sex stig og í öðru sæti eftir þrjá leiki. Fram er enn án sigurs í sumar og er í tíunda sæti með tvö stig.
Vondur dagur
Guðmundur Magnússon fær þetta í dag. Náði ekki að koma sér í mikinn takt við leikinn, sérstaklega framan af. Klikkar svo á vítapunktinum á ögurstundu. Ekki góð vítaspyrna hjá honum.
Dómarinn - 4
Bæði lið eru ósátt við dómgæsluna og það segir alveg svolítið mikið. Valur hefði líklega átt að fá víti snemma leiks þegar Guðmundur Andri fellur innan teigs. Það leit ekki út eins og víti fyrst en við síðari athugun er það líklega vítaspyrna, allavega meira víti en þegar Helgi bendir á punktinn seinna í fyrri hálfleiknum - er GAndri fellur auðveldlega í teignum. Það var svo lítil snerting að það er ekki hægt að réttlæta víti þar. Það var svo rangstöðumark tekið af Val í byrjun síðari hálfleiks sem hefði átt að standa - er mér sagt. Það var að mínu mati rétt að dæma víti þegar Gummi Magg féll í teignum í síðari hálfleik, þar voru þau með stóra ákvörðun rétta. Þetta var erfiður leikur að dæma en Helgi og hans teymi áttu ekki sinn besta dag heilt yfir og fá því miður falleinkunn.